Əliyev “SKA-Xabarovsk”da ilk qolunu vurdu – VİDEO

Futbol üzrə Rusiya Milli Futbol Liqasında (Premyer Liqadan sonrakı ən güclü liqa) 14-cü turun oyunları keçirilib. Arena.az xəbər verir ki, azərbaycanlı hücumçu Kamran Əliyevin komandası “SKA-Xabarovsk” da növbəti matçına çıxıb.

Sözügedən kollektiv doğma meydanda “Volqar-Astraxan” ilə qarşılaşıb. Azərbaycanlı futbolçunun komandası bu oyundan qələbə ilə ayrılıb – 1:0.

Kamran da bu görüşün iştirakçısı olub. O, komandasının start heyətində meydana çıxıb və sonadək mübarizə aparıb. Xararovskluların yeganə qolunu da azərbaycanlı hücumçu vurub. 22 yaşlı futbolçu 69-cu dəqiqədə rəqib qapısına yol tapıb. Bu, Əliyevin “SKA-Xabarovsk”dakı ilk qoludur. O, qol vurduqdan cəmi bir dəqiqə sonra sarı vərəqə ilə də cəzalanıb.

Xabarovsk təmsilçisi Kamranı “Ximki”dən bu mövsümün sonuna kimi icarəyə götürüb. “SKA-Xabarovsk”da vaxtilə Azərbaycanın aşağı yaş qrupları üzrə yığmalarında oynamış David Qarayev də forma geyinir. Yekaterinburq “Ural”ından icarəyə götürülmüş futbolçu bu görüşdə də oynayıb. O, start heyətdə meydana çıxıb və 59-cu dəqiqədə əvəzlənib.

“SKA-Xabarovsk” 14 turdan sonra 27 xalla 20 kollektiv arasında 4-cü pillədə qərarlaşıb.