Futbol üzrə İngiltərə Premyer Liqasında mübarizə aparan “Mançester Yunayted”də komandanın yeni kapitanı məlum olub.
Arena.az bu barədə Mançester klubunun rəsmi “Twitter” hesabına istinadən məlumat verir.
Bu gündən komandanın kapitanı rolu yarımmüdafiəçi Bruno Fernandesə tapşırılıb.
Xatırladaq ki, daha əvvəl “qırmızı şeytanlar”ın baş məşqçisi Erik ten Haq müdafiəçi Harri Maquayrı kapitanlıqdan məhrum etmişdi.
Portuqal yarımmüdafiəçi Bruno Fernandes 2020-ci ilin fevralından “Mançester Yunayted”də çıxış edir. O, “qırmızı şeytanlar”ın heyətində ümumilikdə 185 oyuna çıxıb, 64 qol vurub, 54 məhsuldar ötürmə verib.
“Transfermarkt” internet-portalı 28 yaşlı Bruno Fernandesi 75 milyon avro məbləğində qiymətləndirir.
