“Mançester Yunayted” komandanın portuqal yarımmüdafiəçisi və kapitanı Bruno Fernandeslə yeni müqavilə bağlayıb.
Arena.az bu barədə “Mançester Yunayted”in rəsmi saytına istinadən məlumat verir.
Portuqal yarımmüdafiəçinin “qırmızı şeytanlar”la yeni müqaviləsi 2026/2027-ci illər mövsümünün sonuna qədər qüvvədə olacaq. Yeni müqaviləyə, müddətin daha bir il uzadılma imkanı da daxil edilib.
Bruno Fernandesin cari əmək müqaviləsi isə 2026-cı ilin yayına qədər nəzərdə tutulub.
Bruno Fernandes “Mançester Yunayted”ə 2020-ci ilin yanvarında 65 milyon avro məbləğ müqabilində Lissabon “Sportinq”indən keçib.
Geridə qalmış 2023/2024-cü illər mövsümündə Fernandes “Mançester Yunayted”in heyətində bütün yarışlarda 48 oyuna çıxıb, 15 qol vurub, 13 məhsuldar ötürmə ilə fərqlənib.
Cari mövsümdə Fernandes “qırmzı şeytanlar”ın heyətində 1 oyun keçirib, 1 məhsuldar ötürmə verib.
Fernnandesin “Mançester Yunayted” karyerası ümumilikdə 234 oyun, 79 qol və 67 məhsuldar ötürmədən ibarətdir.
Bruno Fernandes 2017-ci ilin noyabr ayında debüt etdiyi Portuqaliya yığmasının heyətində 71 oyuna çıxıb. Təcrübəli futbolçu bu oyunlarda 23 qol vurub, 20 məhsuldar ötürmə verib.
“Transfermarkt” internet-portalı 29 yaşlı portuqal hücumameylli yarımmüdafiəçinin transfer dəyərini 70 milyon avro məbləğində qiymətləndirir.
