A Seriyası: İddialıların hamısı mövsümü qələbə ilə bitirdi

Bu gün futbol üzrə İtaliya çempionatında (A Seriyası) 2022/2023 mövsümünə yekun vurulub.

Arena.az xəbər verir ki, mövsümün sonuncu – 38-ci turunun son oyun günündə altı qarşılaşma baş tutub.

Çempionluğu bir neçə tur öncə təmin etmiş “Napoli” doğma meydanda “Sampdoriya”nı sınağa çəkib. Neapol təmsilçisi mövsümü inamlı qələbə ilə yekunlaşdırıb.

“Milan” son oyununda “Verona”nı, “Roma” “Spetsiya”nı, “Atalanta” da “Montsa”nı məğlub yola salıb.

Beş qolun qeydə alındığı “Leççe” – “Bolonya” matçında qonaqlar qələbəyə sevinən tərəf olublar. “Udineze”nin qonağı olan “Yuventus” da mövsümü qələbə ilə başa vurub.

Beləliklə, çempion “Napoli” mövsümü 90 xalla başa vurub. “Latsio” 74 xalla ikinci, “İnter” 72 xalla üçüncü yeri tutub. Bu üç komanda ilə birgə, 70 xalı olan “Milan” da İtaliyanı UEFA Çempionlar Liqasında təmsil etmək hüququ qazanıb.

64 xalla 5-ci yeri tutan “Atalanta”, həmçinin 63 xalla 6-cı olan “Roma” Avropa Liqasında iştirak hüququ qazanıb. 10 xalı silinən və 62 xalla 7-ci yeri tutan “Yuventus” isə Avropa Konfrans Liqasında mübarizə aparacaq.

19 xalla sonuncu olan “Sampdoriya” və 27 xalla 19-cu yeri tutan “Kremoneze” A Seriyasını tərk edib. 31 xalla 18-ci sırada qərarlaşan “Verona” isə hələ də elitada qalmaq şansını saxlayır. Buna 17-ci pillədəki “Spetsiya”nın da 31 xal toplamasıdır. Bu üzdən də sözügedən komandalar elitada qalmaq uğrunda pley-off görüşü keçirəcəklər.

İtaliya A Seriyası

38-ci tur
2 iyun

Sassuolo – Fiorentina 1:3
Qol: Berardi, 71-pen – Kabral, 46. Saponara, 79. N.Qonsales, 83.

3 iyun

Torino – İnter 0:1
Qol: Brozoviç, 37.

Kremoneze – Salernitana 2:0
Qol: Buonayuto, 26-pen. Tsadjut, 88.

Empoli – Latsio 0:2
Qol: Romanyoli, 48. Alberto, 90+2.

4 iyun

Napoli – Sampdoriya 2:0
Qol: Osimhen, 64-pen. Simeone, 85.

Milan – Verona 3:1
Qol: Jiru, 45+1-pen. Leao, 85; 90+1 – Faraoni, 72.

Roma – Spetsiya 2:1
Qol: Zalevski, 43. Dibala, 89-pen – Nikolau, 6.

Atalanta – Montsa 5:2
Qol: Koopmeyners, 12; 45+1; 79. Hoylund, 74. Muriel, 90+2 – Kolpani, 51. Petanya, 81.

Leççe – Bolonya 2:3
Qol: Banda, 17. Udin, 88 – Arnautoviç, 58. Zirkze, 81. Ferquson, 90+7.

Udineze – Yuventus 0:1
Qol: Kyeza, 68.