21 yaşadək futbolçulardan ibarət Azərbaycan millisi Avropa çempionatının (AÇ-2025) seçmə mərhələsində bu gün növbəti matçına çıxıb.
Arena.az xəbər verir ki, Samir Əliyevin rəhbərlik etdiyi millimiz seçmə mərhələdəki 8-ci oyununu Serbiya yığmasına qarşı keçirib.
Doğma meydanda baş tutan qarşılaşmanı Fransadan olan hakimlər briqadası idarə edib. Oyunun baş hakimi FİFA referisi Bastyen Deşepi olub. Ona yan xətt hakimləri Aleksis Oje və Bris Parin Le Telye kömək ediblər. Dördüncü hakim funksiyasını Floran Batta yerinə yetirib.
Xatırladaq ki, Azərbaycan millisi bu seçmə mərhələdəki ilk oyununu səfərdə məhz Serbiya yığmasına qarşı keçirmiş və 0:2 hesablı məğlubiyyətə üzülmüşdü. Bu gün komandamızın həmin məğlubiyyətin qisasını almaq üçün yaxşı imkanı vardı. Amma təəssüf ki, U-21 yığmamız cavab görüşündə də bu rəqibinə oxşar hesabla uduzub.
Komandamızın bu seçmə mərhələdə qazandığı yeganə qələbə Lüksemburqla ev oyununa təsadüf edib – 3:2. Millimiz qalan oyunlarının hamısından məğlubiyyətlə ayrılıb. Ukraynaya səfərdə 0:1, evdə 0:3, Şimali İrlandiyaya evdə 0:1, İngiltərəyə evdə 1:5, Lüksemburqa səfərdə 0:2 hesabıyla uduzmuşuq.
F qrupunun bu gün baş tutacaq digər oyununda Ukrayna yığması Şimali İrlandiyanın qonağı olacaq.
AÇ-2025-in seçmə mərhələsi
F qrupu
10 sentyabr
Azərbaycan – Serbiya
Baş hakim: Bastyen Deşepi, Aleksis Oje, Bris Parin Le Telye, Floran Batta (Hamısı Fransada).
Dalğa Arena. Saat 19:00.
Azərbaycan: 1. Yusif İmanov, 4. Cəlal Hüseynov, 5. Mahir Həsənov, 21. İbrahim Ramazanov, 2. Abdulla Rzayev, 3. Rüfət Abbasov, 13. Emil Səfərov, 8. Fərid Yusifli (k), 14. Xəyal Əliyev, 9. Nəriman Axundzadə, 18. Ağadadaş Salyanski.
Ehtiyat oyunçular: 22. Eldar Tağızadə, 6. Şahin Şahniyarov, 10. Samir Abdullayev, 11. Samir Məhərrəmli, 15. Süleyman Damadayev, 16. Qurban Səfərov, 17. Murad Vəliyev, 19. Rauf Rüstəmli, 20. Rüfət Əhmədov.
Baş məşqçi: Samir Əliyev.
Serbiya: 12. Lazar Kaliçanin, 3. Mixaylo İliç (k), 6. Voyin Serafimoviç, 16. Lazar Konstantinov, 14. Vukaşin Curceviç, 4. Nikola Miliçiç, 17. Stefan Codiç, 20. Yovan Şlyiviç, 7. Yovan Miyatoviç, 22. Marko Veliçkoviç, 10. Yovan Miloşeviç.
Ehtiyat oyunçular: 23. Dimitriye Stevanoviç, 2. Oqnyen Mimoviç, 8. Mixaylo Petkoviç, 9. Samed Bajdar, 11. Matiya Qluşçeviç, 13. Stefan Bukinaç, 15. Duşan Pavloviç, 18. Aleksey Vukiçeviç, 21. Nemanya Trifunoviç.
Baş məşqçi: Lyubinko Druloviç.
Xal: Ukrayna – 21. İngiltərə – 19. Serbiya – 13. Lüksemburq – 7. Şimali İrlandiya – 7. Azərbaycan – 3.
