Bu gün AFFA İntizam Komitəsinin növbəti iclası keçirilib. Arena.az xəbər verir ki, aparılan müzakirələrdən sonra Azərbaycan Premyer Liqasının və Birinci Divizionun son oyunları ilə bağlı aşağıdakı qərarlar qəbul olunub:
Azərbaycan Premyer Liqası, 28-ci tur
“Turan Tovuz” – “Sumqayıt” oyununda “Sumqayıt”ın futboçusu Vüqar Mustafayev ciddi qayda pozuntusuna görə birbaşa qırmızı vərəqə aldığı üçün 2 oyun cəzalanıb. Onun klubu isə buna görə 1600 manat cərimə edilib.
“Kəpəz” – “Səbail” oyunu başa çatdıqdan sonra meydançaya kənar şəxslərin daxil olub. Buna görə “Kəpəz” klubu 1600 manat cərimə edilib.
“Sabah” – “Qəbələ” oyunundan əvvəl meydançaya kənar şəxslər daxil olub. Buna görə “Sabah” klubu da 1600 manat cərimə edilib.
Birinci Divizion, 22-ci tur
“Zirə-2” – MOİK oyununda “Zirə”nin 4 futbolçusu sarı vərəqə ilə cəzalandığına görə komanda 80 manat cərimə olunub.
“Sumqayıt-2” – “Mingəçevir” oyununda “Mingəçevir”in futbolçusu Elvin Əlizadə rəqibi aşkar qol imkanından məhrum etdiyinə görə birbaşa qırmızı vərəqə alıb. O, buna görə AFFA tərəfindən 1 oyun cəzalanıb, klubu isə 20 manat cərimə olunub.
“Şamaxı-2” – “Səbail-2” oyununda xərəkdaşıyan uşaqların yaşı əsasnamənin tələblərinə uyğun olmadığına görə “Şamaxı” klubu 80 manat cərimə olunub.
“İmişli” – “Neftçi-2” oyununda “İmişli”nin futbolçusu Elnur Məmmədov ikinci sarı vərəqə alaraq meydançadan kənarlaşdırılıb. O, buna görə 1 oyun cəzalanıb, klubu isə 20 manat cərimə edilib.
“İmişli” – “Neftçi-2” oyununda PFL əsasnaməsinin 9-cu bəndi pozulduğuna görə “İmişli” klubu 80 manat cərimə edilib.
“Kəpəz-2” – “Qaradağ Lökbatan” oyununda “Kəpəz”in 5 futbolçusu sarı vərəqə ilə cəzalandığına görə, Gəncə klubu 80 manat cərimə edilib.
