“Səbail”in baş məşqçisi Aftandil Hacıyev Premyer Liqanın 25-ci turu çərçivəsində “Şamaxı”ya qarşı keçirdikləri oyunu şərh edib. Arena.az xəbər verir ki, o, 0:0 hesabıyla bitən matçdan sonra bunları söyləyib:
“Bölgələrdə futbol həyəcanı tam başqa cür olur. Bunu hamımız hiss etdik. Şamaxı azarkeşləri, bizim fanatlar yaxşı ab-hava yaratmışdılar. İnanırıq ki, gələcəkdə bölgə klublarının sayı artar.
Bu oyunda hesab açılmasa da, azarkeşlər maraqlı futbolun şahidi oldular. Qol buraxmamağımız bizi sevindirdi. Amma son nöqtəni qoymaqla bağlı çatışmazlıq var. Bu, ehtiyat oyunçularımızın az olması ilə bağlıdır. Mirsayib Abbasov əsas hücumçumuzdur. Ondan razıyıq. 1 xal qazandığımız üçün sevinirik”.
Onun sözlərinə görə, ilk hissədə yaxşı qol epizodları yaxalayıblar: “Sadəcə, oyun boyu dinamikanı saxlamaq çətin olur. Son dəqiqələrdə rəqib tam qüvvə ilə irəli atılmışdı, arxada boşluqlar verirdi. Hər iki komanda meydandan qələbə ilə ayrıla bilərdi. Düşünürəm ki, 1:1 hesabı ədalətli nəticədir”.
Aftandil Hacıyev ilk hissədə zədələnərək əvəzlənən Rəşad Əzizlinin durumuna da toxunub: “Ayağında ağrılar var idi. Məcburi əvəzetmə etdik. Bakıya qayıtdıqdan sonra vəziyyəti ilə bağlı dəqiq məlumat verə biləcəyik”.
“Qalib gələ bilmədiyimiz üçün məyus olduq”
“Şamaxı”nın baş məşqçi vəzifəsini icra edən Rüstəm Əliyev isə bunları dilə gətirib:
“Qalib gələ bilmədiyimiz üçün məyus olduq. Amma komandamın döyüşkənliyini gördüm. Futbolçular verilən tapşırıqları yerinə yetirdilər. Səbrli olmaq, məğlubiyyətləri unutdurmaq lazımdır. Gələcəkdə bundan da yaxşı oynamağa çalışacağıq”.
Rüstəm Əliyev matçın sonlarındakı mübahisəli epizoda da toxunub: “Biz də kənardan elə gördük ki, top rəqibin əlinə dəydi. Yenə də epizoda təkrar baxmaq lazımdır”.
