Aksel Vitsel “Atletiko” ilə yeni müqavilə bağladı

Madrid “Atletiko”su “döşəkçilər”in belçikalı veteran mərkəz müdafiəçisi Aksel Vitsel ilə anlaşaraq, müqaviləsini yeniləyib.

Arena.az bu barədə İspaniya klubunun mətbuat xidmətinə istinadən məlumat verir.

Yenilənmiş müqavilənin müddəti 2025-ci ilin iyun ayının sonuna qədər qüvvədə olacaq.

Aksel Vitsel Lyej “Standard”ının yetirməsidir. Müdafiəçi karyerası ərzində “Benfika”, “Zenit” (Sankt-Peterburq), “Tyantszin Tyanhay” və “Borrussiya”da (Dortmund) çıxış edib. “Atletiko” Vitseli 2022-ci ilin iyulunda “Borussiya”dan azad agent qismində heyətinə qatıb.

Geridə qalmış 2023/2024-cü illər mövsümündə Vitsel “döşəkçilər”in heyətində bütün yarışlarda 51 oyuna çıxıb, 2 qol vurub. Belçikalı müdafiəçinin Madrid klubunda çıxışının ümumi mənzərəsi isə belədir: 94 oyun, 2 qol, 1 məhsuldar ötürmə.

Vitsel 2008-ci ilin martında debüt etdiyi Belçila yığmasının heyətində 132 oyuna 12 qol, 8 məhsuldar ötürmə ilə fərlənib.

“Transfermarkt” internet-portalı 35 yaşlı belçikalı mərkəz müdafiəçisinin transfer dəyərini 3,50 milyon avro məbləğində qiymətləndirir.