ALMANİYA

Almaniya futbolu: Əksər ölkələrdə olduğu kimi, Almaniyada da ən populyar idman növü futboldur. Almaniya Futbol Assosiasiyası (DFB), 26 mindən çox futbol klubundan təşkil olunan 6.6 milyon üzv ilə idmanın milli rəhbər orqanıdır.

“Drezden İngilis Futbol Klubu” Almaniyanın ilk müasir futbol klubu hesab olunur. Drezden ətrafında yaşayan və işləyən ingilislər tərəfindən 1874-cü ildə yaradılıb. Sonralar Berlin, Hamburq və Ştutqart şəhərlərində də futbol klubları qurulub.

Ölkənin əsas futbol çempionatı Bundesliqa hesab olunur. Bu turnir 1963-cü ildən keçirilir. Həm əsas Bundesliqada, həm də gücünə görə ondan sonra gələn 2-ci Bundesliqada 18 komanda mübarizə aparır. “Hamburq” 1063-cü ildən etibarən Bundesliqanın hər mövsümündə iştirak edən yeganə klubdur. Bundesliqada ən çox çempionuq sevinci yaşamış komanda isə “Bavariya”dır.

“DFB-Pokal” adlandırılan ölkə kuboku isə 1952-ci ildən təşkil olunur.

Əsas və 2-ci Bundesliqa Almaniya Futbol Liqası (DFL) tərəfindən təşkil olunur. DFB-Pokal və digər futbol yarışları isə Almaniya Futbol Assosiasiyasının təşkilatçılığı ilə keçirilir.

Almaniyanın milli futbol komandası, Almaniyanı 1908-ci ildən bəri beynəlxalq futbol yarışlarında təmsil edir. Alman futbolunun rəhbər orqanı olan Almaniya Futbol Assosiasiyası tərəfindən idarə olunur.

Almaniya millisi tarixində dörd dəfə (1954, 1974, 1990, 2014) dünya çempionu olub. Almanlar bu baxımdan İtaliya ilə birgə ikinci ən yaxşı göstəriciyə şəriklik edirlər. Rekord isə Braziliya yığmasına aiddir. Cənubi amerikalılar 5 dəfə dünya çempionu olublar.

Əvəzində Almaniya yığması Avropa çempionatında ən çox çempionluq yaşamış iki komandadan biridir. Belə ki, sözügedən komanda üç dəfə (1972, 1980, 1996) Avropa çempionu olub. Almanların bu göstəricidəki şəriki isə İspaniya yığmasıdır.

Almaniya futbolu həvəskarları digər ölkələrdə də çoxdur. Elə Azərbaycanda da Bundesliqaya böyük maraq var. Ölkəmizdə Almaniya yığmasının, Almaniyanın aparıcı klublarının azarkeşləri kifayət qədərdir.