Bu il keçirilmiş Amerika Kubokunda Kolumbiya yığması ilə oyunda (0:1) dava salmış uruqvaylı futbolçulara cəza kəsilib.
Arena.az bu barədə CONMEBOL-un mətbuat xidmətinə istinadən məlumat verir.
Qurum oyundan sonra kolumbiyalı azarkeşlərlə münaqişəyə girmiş Uruqvay yığmasının 5 futbolçusu haqda intizam tədbiri görüb.
Uruqvay yığmasının müdafiəçiləri Matias Olivera, Ronald Arauxo, Xose Ximenes 3 oyunluq cəza alıblar. Yarımmüdafiəçi Rodriqo Bentankur 4 oyunu tirbunalardan izləməli olacaq, hücumçu Darvin Nunyes isə yığma komandanın 5 oyunun buraxacaq.
Xatırladaq ki, Amerika Birləşmiş Ştatlarında təşkil olunmuş 2024-cü il Amerika Kubokunun qalibi Argentina yığması olub. “Albiseleste” finalda Kolumbiya yığması üzərində əlavə vaxtda 1:0 hesablı qələbə qazanıb.
Uruqvay yığması isə Kanada kollektivi ilə 2:2 hesabılı oyunun penaltilər silsiləsində 4:3 hesablı qələbə qazanaraq, Amerika Kubokunda bürünc medalçı olub.
