“Real”ın baş məşqçisi Karlo Ançelotti “Atletirko” ilə Madrid derbisi ərəfəsində “döşəkçilərin” əhval-ruhiyyəsi haqda danışıb.
Arena.az “Sport.es” dərgisinə istinadən, italyan mütəxəssisin bu barədə fikrini təqdim edir:
“Atletiko” ilə oyun həmişə xüsusidir, çünki bu, derbidir. Bu komanda ötən mövsümlə müqayisədə xeyli yaxşılaşıb. Klub çox yaxşı oyunçularla müqavilə imzalayıb və sona qədər bizimlə və “Barselona” ilə La Liqa çempionluğu uğrunda mübarizə aparacaq”, deyə Ançelotti vurğulayıb.
Xatırladaq ki, “Real” bu gün, sentyabrın 29-da İspaniya La Liqasının 8-ci turu çərçivəsində “Metropolitano”da Madrid “Atletiko”sunun qonağı olacaq. Hakim oyunu Bakı vaxtı ilə saat 23:00-da başladacaq.
7 oyundan 17 xalla “Real” La Liqanın yarış cədvəlində 2-ci pillədə, “Atletiko” isə 15 xalla 3-cü pillədə qərarlaşıb. La Liqaya 8 oyundan 21 xal toplamış “Barselona” başçılıq edir.
