Futbol üzrə Azərbaycan millisinin müdafiəçisi Anton Krivotsyuk Cənubi Koreyanın “Daejeon Hana Sitizen” komandasında növbəti matçına çıxıb.
Arena.az xəbər verir ki, futbolçumuzun komandası ölkə çempionatının (K Liqa 1) 4-cü turu çərçivəsində “İnçeon”la qarşılaşıb.
“Daejeon Hana Sitizen” bu rəqiblə səfərdə üz-üzə gəlib. Futbolçumuzun komandası bu matçda meydanı məğlubiyyətlə tərk edib – 0:2.
Anton bu görüşün 71-ci dəqiqəsində meydana buraxılıb. Cari mövsümdə ilk dəfə meydana çıxan millimizin üzvü 90+2-ci dəqiqədə sarı vərəqə də alıb.
Xatırladaq ki, Krivotsyuk zədə səbəbindən mövsümün ilk 3 oyununda komandasına kömək edə bilməmişdi.
“Daejeon Hana Sitizen” 4 turdan sonra topladığı 2 xalla 12 iştirakçı arasında 11-ci pillədə qərarlaşıb. Komanda 4 oyunda 2 heç-heç edib, 2 məğlubiyyətə üzülüb.
Xatırladaq ki, Anton Krivotsyuk Cənubi Koreya klubuna 2023-cü ilin fevral ayında Polşanın “Visla” (Plotsk) komandasından 600 min avro qarşılığında transfer olunub. O, bu komandanın heyətində 35 oyuna çıxıb, 1 qol, 1 məhsuldar ötürmə müəllifi olub.
Anton daha öncə Azərbaycanda “Neftçi”nin uğurları üçün çalışıb. Mərkəz müdafiəçisi Azərbaycan yığma komandasında da 35 matça çıxıb, 1 qola imza atıb.
