“Mançester Siti”nin keçmiş hücumçusu Serxio Aquero maraqlı açıqlaması ilə futbol ictimaiyyətinin diqqətini çəkib.
Arena.az “Mundo Deportivo” nəşrinə istinadən məlumat verir ki, argentinalı keçmiş futbolçu “Real”ın iki ulduzu – fransalı hücumçu Kilian Mbappenin oyun keyfiyyətlərinə görə, braziliyalı Vinisius Juniordan üstün olub-olmaması ilə bağlı sualı cavablayıb:
“Onlardan birinin malik olduğu keyfiyyətlərə, ikincisi malik deyil və əksinə. Mbappe “Real”ın oyununa uyğunlaşmağa çalışmalıdır. PSJ-də o, öndə qalırdı, əks-hücuma keçib onu bitirmək fürsətini gözləyirdi, amma burada tamam başqa oyundur. İndi rəqibləri məhv edən, PSJ-dən olan o Mbappeni görmürük. “Real”a qarşı oynayarkən Mbappenin deyil, Vinisiusun bölgəsini qorumaq gərəkdir. Rəqiblərinə başağrısı verən odur”, deyə Aquero vurğulayıb.
Vinisius Junior “Flamenqo”nun yetirməsidir. Braziliyalı cinah hücumçusu “Real”a 2018-ci ilin iyul ayında 45 milyon avro məbləğ müqabilində elə, “Flamenqo”dan keçib. Vinisiusun İspaniya nəhəngi ilə müqaviləsi 2027-ci ilin iyun ayının sonuna qədər qüvvədədir.
Cari mövsümdə “Vini” madridlilərin heyətində 14 oyuna çıxıb, 8 qol və 7 məhsuldar ötürmə ilə fərqlənib. Vinisiusun “Real”da çıxışının ümumi mənzərəsi isə belədir: 278 oyun, 91 qol, 82 məhsuldar ötürmə.
“Vini” “qaymaqlılar”la İspaniya La Liqasının (2019/2020, 2021/2022, 2023/2024), İspaniya Kral Kubokunun (2022/2023), İspaniya Super Kubokunun (2019/2020, 2021/2022, 2023/2024), Çempionlar Liqasının (2021/2022, 2023/2024), UEFA Super Kubokunun (2022/2023, 2024/2025), FIFA Klub Dünya Kubokunun (2019, 2023) qalibi olub.
Vinisius Junior 2019-cu ilin sentyabrında debüt etdiyi Braziliya milli komandasının heyətində 35 oyun keçirib, 5 qol vurub və 5 məhsuldar ötürmə verib. “Vini” Braziliyanın U-15, U-17 komandaları ilə Cənubiamerikan Çempionatının qalibi olub.
“Transfermarkt” internet-portalı 24 yaşlı braziliyalı sol vingerin transfer dəyərini 200 milyon avro məbləğində qiymətləndirir. Bu məbləğ “Vini”nin dünyanın ən bahalı iki futbolçusundan biri olması deməkdir.
