Argentina yığması Almaniyanın “adidas” idman brendi ilə əməkdaşlığın 50 illiyi şərəfinə xüsusi futbol geyimi dəstini təqdim edib.
Arena.az bu barədə Argentina yığmasının mətbuat xidmətinə istinadən məlumat verir:
“İlk əməkdaşlıqlarının 50-ci ildönümünün qeyd edilməsi çərçivəsində “adidas” və Argentina Futbol Assosiasiyası (AFA) Argentina milli yığma komandasının futbol geyimi dəstinin xüsusi buraxılışını təqdim edirlər.
“50 il – qəlbdə və dəridə” şüarı altındakı futbol köynəyi “adidas”ın 1974-cü il Dünya Kuboku üçün Argentina milli yığma komandasının ilk futbol geyimi dəstindən ilhamlanıb”, – Argentina yığmasının mətbuat xidmətinin təqdimatında deyilir.
Həmçinin bildirilir ki, “albiseleste” bu yeni xüsusi futbol geyimi dəstindən 2026-cı il dünya çempionatının seçmə mərhələsi çərçivəsində noyabrın 20-də Peru yığması ilə oyunda istifadə edəcək. Gələcək oyunlarda və 2025-ci il ərzində komanda keçən ilin martında buraxılmış futbol geyimi dəstini istifadə etməyə davam edəcək.
