AVROPA LİQASI

AVROPA LİQASI UEFA tərəfindən 2009-cu ildən keçirilməyə başlayıb. UEFA Çempionlar Liqasından sonrakı ən əhəmiyyətli klub turniridir.

AVROPA LİQASI əvvəllər fərqli adlarla da təşkil olunub. 1955-ci ildə başladılan turnir əvvəllər “Şəhərlər Kuboku” adlanıb. 1971-ci ildə Şəhərlər Kubokunun adı “UEFA Kuboku” olaraq dəyişdirilib. 1999-ci ildə isə UEFA “Kubok Qalibləri Kuboku” turnirini ləğv edərək onu “UEFA Kuboku” ilə birləşdirib. 2004/05 mövsümündən əvvəl qrup mərhələlərində bəzi status dəyişiklikləri edilən kubok 2009-ci ildəki son tənzimləmə ilə indiki halını alıb. Bu dəyişikliklər nəticəsində “UEFA Avropa Liqası”, UEFA Kubokunun davamı olaraq qəbul edilib. Son dəyişikliklərdə ad və status yenilənməsinin yanında kubok “UEFA İntertoto Kuboku” ilə də birləşdirilib.

UEFA Kubokunun ilk qalibi 1972-ci ildə təşkil olunan final matçında qələbə qazanan İngiltərənin “Tottenhem” klubu olub. Ad dəyişikliyi sonrasında ilk çempionluğu qazanan komanda isə Madrid “Atletiko”sudur. İspaniya təmsilçisi 2010-cu ildə baş tutan İngiltərə “Fulhem”i ilə final görüşündən 2:1 hesabıyla qalib ayrılıb.

Avroliqanın ən çox qalibi olan komanda isə “Sevilya”dır. İspaniya klubu altı dəfə (2006, 2007, 2014, 2015, 2016 və 2020-ci illərdə) Avroliqanın qalibi olub. Ən maraqlısı isə “Sevilya”nın iştirakçısı olduğu bütün final görüşlərindən qalib ayrılmasıdır.

Azərbaycanın Avroliqadakı ilkləri

Azərbaycan 1994-cü ilə kimi bu turnirdən kənarda qalıb. Yalnız 1994-cü ildə UEFA-ya müstəqil dövlət kimi üzv olduqdan sonra qitə turnirlərində çıxış etmək mümkün olub. İlk oyun məhz UEFA kuboku turnirinin ilkin mərhələsində 9 avqust 1994-cü ildə Türkiyənin “Fənərbaxça” və Azərbaycan çempionu olan “Turan” (Tovuz) klubları arasında olub. İstanbulun “Şükrü Saracoğlu” stadionunda keçirilən görüşdə Tovuz təmsilçisi 0:5 hesabıyla uduzub. Cavab oyunu 23 avqustda Sumqayıt şəhərindəki Mehdi Hüseynzadə adına stadionda keçirilib. Bu Azərbaycanda keçirilmiş ilk avrokubok oyunu kimi tarixə düşüb. Bu oyunda da “Fənərbaxça” 2:0 hesabı ilə qalib gəlib.

Artıq tarixin yaddaşına qovuşan UEFA Kubokunda klublarımız arasında ilk və yeganə mərhələ sevincini “Karvan” yaşayıb. Yevlax təmsilçisi 2006-cı ildə Slovakiyanın “Spartak” (Trnava) klubunu mübarizədən kənarlaşdırmaqla bu uğura imza atıb. İyulun 13-də Bakıdakı “Şəfa” stadionunda keçirilən ilk matçda 1:0 qalib gələn təmsilçimiz Slovakiyadakı cavab matçında da eyni hesabla üstün olub. Beləliklə “Karvan” Azərbaycan klubları arasında ilk dəfə UEFA kubokunda mərhələ adlayıb.

Avroliqada qrupa düşən ilk klubumuz “Neftçi”dir. 2012-ci ildə turnirin pley-offunda Cənubi Kiprin güclü APOEL klubuna qalib gələn paytaxt klubu, Azərbaycan futbolu tarixində ilk dəfə Avroliqanın qrupunda oynamaq hüququ qazanıb. Bu turnirin qrupunda ilk xalımızı da “Neftçi” qazanıb. “Ağ qaralar” 2012-ci ilin sentyabrın 20-də qrupdakı ilk matçında səfərdə Serbiya “Partizan”ı ilə 0:0 oynamaqla bu uğura imza atıb. Qrup mərhələsindəki ilk qolumuzu da “Neftçi” vurub. 2012-ci il oktyabrın 10-da Bakıda İtaliya “İnter”i ilə matçın 53-cü dəqiqəsində Nikolas Kanales fərqlənib.

Avroliqanın qrupundakı ilk qələbəmizi isə “Qarabağ” qazanıb. Ağdam klubu 2014-cü ilin 10 oktyabrında səfərdə Ukraynanın “Dnepr” klubuna 1:0 hesabı ilə qalib gəlib.