Ötən gün Qətərin paytaxtı Doha şəhərində cüdo üzrə böyüklər arasında təşkil olunmuş dünya çempionatı başa çatdı. Arena.az xəbər verir ki, bu mundial Azərbaycan milli komandası üçün uğurlu alınmadı.
Çempionatın fərdi yarışları 7-13 may tarixlərində, komanda yarışları isə 14 mayda keçirilib. Azərbaycan dünya çempionatında 9 çəki dərəcəsi üzrə 9 kişi və 4 qadın ilə təmsil olunub. Lakin yalnız Zelim Kotsoyevi çıxmaq şərtilə, digər cüdoçularımızın hamısı bu dünya çempionatında fiasko ilə üzləşib. Hətta yığmamızın ən böyük medal ümidlərindən olan Səid Mollayinin startdaca mübarizəni dayandırması acınacaqlı hal kimi qeyd oluna bilər. Qadınlar arasında Leyla Əliyeva ilə Könül Əliyeva da mübarizəni startdaca dayandırdı.
Digər cüdoçularımızın əksəri ikinci və ya üçüncü görüşlərində uduzmaqla yarışdan kənarda qaldı. Düzdü, Hidayət Heydərovun da Zelim Kotsoyev kimi bürünc medal qazanmaq şansı var idi. Lakin o, həlledici döyüşdə uduzmaqla bu şansı əldən verdi. Yığmamızı daha biabırçı fiaskodan yalnız Kotsoyev xilas etdi. Onun qazandığı bürünc medalı da yalnız kiçik bir təsəlli saymaq olar.
Beləliklə, Azərbaycan yığması bu dünya çempionatında ümumi hesabda 20-ci yeri tutub. Yaponiya (5-2-4) birinci, Fransa (2-3-2) ikinci, Gürcüstan (2-1-1) üçüncü olub. Kişilərin sıralamasında Azərbaycan komandası 11-ci olub.
Dünya çempionatı
Qadınlar
-48 kq
Leyla Əliyeva – Raquel Brito (Portuqaliya) -:+
Könül Əliyeva – Qaliya Tınbayeva (Qazaxıstan) -:+
-52 kq
Gültac Məmmədəliyeva – Sofia Fiora (Argentina) +:-
Gültac Məmmədəliyeva – Amandine Buxard (Fransa) -:+
Aydan Əliyeva – Erza Muminovyo (Kosova) +:-
Aydan Əliyeva – Odette Cuffrida (İtaliya) -:+
Kişilər
-60 kq
Balabəy Ağayev – Frac Duibi (Tunis) +:-
Balabəy Ağayev – Yunes Saddiki (Mərakeş) -:+
Turan Bayramov – Yohan Rohas (Kolumbiya) +:-
Turan Bayramov – Naohisa Takato (Yaponiya) -:+
-66 kq
Orxan Səfərov – Daikli Buba (Fransa) +:-
Orxan Səfərov – Elios Mantsi (İtaliya) -:+
-73 kq
Hidayət Heydərov – Adil Osmanov (Moldova) +:-
Hidayət Heydərov – Cek Yonezuka (ABŞ) +:-
Hidayət Heydərov – Artur Margelidon (Kanada) +:-
Hidayət Heydərov – Manuel Lombardo (İtaliya) -:+
Bürünc medal görüşü
Hidayət Heydərov – Soiçi Haşimoto (Yaponiya) -:+
-81 kq
Səid Mollayi – Fransua Qotyer Drapau (Kanada) -:+
-90 kq
Məmmədəli Mehdiyev – Kevin Budayin (Kamerun) +:-
Məmmədəli Mehdiyev – Erlan Şerov (Qırğızıstan) +:-
Məmmədəli Mehdiyev – Markus Niman (İsveç) -:+
Murad Fətiyev – Aleks Kret (Rumıniya) +:-
Murad Fətiyev – Teodoros Tselidis (Yunanıstan) +:-
Murad Fətiyev – Silva Morales (Kuba) -:+
-100 kq
Zelim Kotsoyev – Aleksandar Kukolya (Serbiya) +:-
Zelim Kotsoyev – Aaron Fara (Avstriya) +:-
Zelim Kotsoyev – Peter Palçik (İsrail) +:-
Zelim Kotsoyev – Lukas Krpalek (Çexiya) -:+
Bürünc medal görüşü
Zelim Kotsoyev – İlia Sulamanidze (Gürcüstan) +:-
+100 kq
Uşanqi Kokauri – Kodi Andrevs (Yeni Zelandiya) +:-
Uşanqi Kokauri – Martti Puumalaynen (Finlandiya) +:-
Uşanqi Kokauri – İnal Tasoyev (Rusiya) -:+
