Gələn həftə – iyunun 3-də futbol üzrə Azərbaycan kubokunda 2022/2023 mövsümünün final qarşılaşması keçiriləcək. Arena.az xəbər verir ki, həlledici oyunda “Neftçi” və “Qəbələ” komandaları üz-üzə gələcək.
Artıq final qarşılaşmasının oyunöncəsi hazırlıq məşqləri və mətbuat konfranslarının vaxtı bəlli olub. Bu barədə Peşəkar Futbol Liqasının rəsmi saytı məlumat yayıb.
Xəbərdə bildirilir ki, iyunun 2-də “Neftçi”nin baş məşqçisi Laurentsiu Regekampfın mətbuat konfransı baş tutacaq. Tədbirə saat 17:30-da start veriəcək. Yarım saat sonra (18:00) isə “Neftçi” komandasının oyunöncəsi son məşqi start götürəcək. Hazırlığın ilk 15 dəqiqəsi mətbuat üçün açıq olacaq.
Həmin gün saat 19:30-da “Qəbələ”nin baş məşqçisi Elmar Baxşıyevin də mətbuat konfransı start götürəcək. Yarım saat sonra – 20:00-da da “Qəbələ” komandasının oyunöncəsi son məşqinə start veriləcək. Bu komandanın da məşqinin ilk 15 dəqiqəsi mətbuat üçün açıq olacaq.
Xatırladaq ki, “Bakcell Arena”da baş tutacaq “Neftçi” – “Qəbələ” finalına saat 20:00-da start veriləcək.
