Futbol üzrə Azərbaycan Kubokunun 2023/2024 mövsümünün finalından əvvəl Aygün Kazımovanın iştirakı ilə konsert proqramı baş tutacaq.
Arena.az xəbər verir ki, bu barədə Peşəkar Futbol Liqasının (PFL) rəsmi saytı məlumat yayıb.
Xalq artisti iyunun 2-də baş tutacaq mövsümün son matçından əvvəl təşkil olunacaq konsert proqramına dəvət alıb. Tədbir saat 19:00-da başlayacaq.
Qeyd edək ki, Azərbaycan Kubokunun finalında “Qarabağ” və “Zirə” komandaları üz-üzə gələcəklər.
Yeri gəlmişkən, artıq kubokun final oyununun biletlərinin satış tarixi də məlumdur. Peşəkar Futbol Liqasının rəsmi saytının yaydığı məlumata görə, “Qarabağ” – “Zirə” qarşılaşmasının biletləri mayın 25-dən etibarən “Dalğa Arena” və Tofiq Bəhramov adına Respublika stadionunun kassalarında satışda olacaq.
Oyuna biletlərin qiyməti yerlərdən asılı olaraq 5, 10, 15 və 50 manatdır.
