İspaniya çempionu “Barselona” Fransa milli komandasının da üzvü olan müdafiəçisi Samuel Umtiti ilə yollarını ayırıb.
Arena.az bu barədə Kataloniya klubunun rəsmi saytına istinadən xəbər verir.
29 yaşlı futbolçu ilə 2026-cı ilin yayına qədər olan müqaviləyə qarşılıqlı razılıq əsasında xitam verilib. Təcrübəli oyunçunun karyerasını harada davam etdirəcəyi hələ tam dəqiqləşməyib.
Xatırladaq ki, Samuel Umtiti “Barselona”ya 2016-cı ilin iyul ayında Lion “Olimpik”indən 25 milyon avroya transfer olunmuşdu. O, Kataloniya təmsilçisində bütövlükdə 133 oyun keçirib, 2 qol və 1 assist müəllifi də olub. Umtiti bu komanda ilə 2 dəfə İspaniya çempionu olub, 3 dəfə ölkə kubokunu və 2 dəfə İspaniya Super Kubokunu qazanıb.
Samuel ötən mövsümü icarə əsasında İtaliyanın “Leççe” klubunda keçirib. O, A Seriyası təmsilçisində 25 oyun keçirib. Umtitinin “Olimpik” kayrerası isə 170 oyun, 5 qol və 3 assistdən ibarətdir.
Umtiti Fransa yığmasında da 31 oyun keçirib və 4 qola imza atıb. O, millinin heyətində DÇ-2018-in qalibi olub.
