Basketbol Liqası: “Gəncə” finalda hesabı bərabərləşdirdi

Bu gün Azərbaycan Basketbol Liqasının 2022/2023 mövsümündə “Sabah” və “Gəncə” komandaları arasında final seriyasının ikinci oyunu baş tutub. Arena.az xəbər verir ki, “Sərhədçi” İdman Mərkəzində baş tutan oyun gəncəlilər üçün uğurlu alınıb.

Gərgin və maraqlı mübarizə şəraitində davam edən görüşün sonuna yaxın üstünlüyü əldən verən “Sabah” 74:78 hesabı ilə məğlub olub.

Qalib komandanın ən məhsuldar basketbolçusu Kollin Törner olub – 14 xal, 7 ribaund. “Sabah”ın heyətində isə Entoni Patti fərqlənib – 26 xal, 14 ribaund.

Bu qələbə sayəsində “Gəncə” finalı seriyasında hesaba tarazlıq gətirib – 1:1. İlk oyunda “Sabah” bu rəqibinə 71:69 hesabı ilə qalib gəlmişdi.

Final seriyasının üçüncü oyunu mayın 24-də keçiriləcək. Yenə eyni məkanda baş tutacaq qarşılaşmaya saat 19:30-da start veriləcək.

Reqlamentə əsasən, super seriyada ən tez üç qələbə qazanmış kollektiv 2022/2023 mövsümü üzrə Azərbaycan çempionu olacaq. İlk üç oyunda çempion müəyyənləşməsə, əlavə oyunlar keçiriləcək.

Mayın 19-da Azərbaycan Basketbol Liqasında 3-cü yer uğrunda oyun keçirilib. Bürünc medal uğrunda “AAAF Xırdalan” və NTD komandaları üz-üzə gəliblər. Bir oyundan ibarət bu mübarizədən NTD basketbolçuları qalib ayrılıblar – 100:79.

Xatırladaq ki, “Gəncə” NTD ilə yarımfinal seriyasının ümumi hesabında 2:1 hesabıyla üstün olmuşdu (101:73, 76:105, 106:103). “Sabah” isə “AAAF Xırdalan”ı elə ilk iki oyunda üstələyərək (86:71, 83:77) finala yüksəlmişdi.