“Real”ın ingilis mərkəz yarımmüdafiəçisi Cud Bellingem “Real”dakı komanda yoldaşları ilə müqaşişə yaşadığı haqda şayiələri təkzib edib.
Arena.az xatırladır ki, daha əvvəl müxtəlif mətbuat səhifələrində ingilis futbolçunun “qaymaqlılar”ın digər ulduzları – braziliyalı hücumçular Vinisius Junior və Rodriqo Qoes, həmçinin “Real”ın yeni transferi, fransalı hücumçu Kilian Mbappe ilə yola getmədiyi haqda silsilə xəbərlər yayılmışdı.
“Mən sosial şəbəkələrdə, Mbappe, Rodriqo, Vinisius və mənim aramda gərginlik yaratmağa çalışanları görmüşəm. Yeganə həqiqət odur ki, biz təkcə meydanda deyil, həm də meydandan kənarda çox yaxşı dostlarıq”, deyə Cud ağzıgöyçəklərin ağzını mumlayıb.
Cud Bellingem “Real”a 2023-cü ilin iyun ayının əvvəlində Dormund “Borussiya”sından keçib. “Kral klubu” ingilis yarımmüdafiəçinin transferi müqabilində 103 milyon avro məbləğində xərc çəkib. Cud İspaniya nəhəngi ilə müddəti 2029-cu ilin iyun ayının sonuna qədər qədər nəzərdə tutulmuş müqaviləyə imza atıb.
Gənc ingilis futbolçunun Madrid klubundakı çıxışı elə, ilk mövsümdəcə uğurlu alınıb. 2023/2024-cü illər mövsümündə Bellingem “Real”ın heyətində bütün yarışlarda 42 oyuna çıxıb, 23 qol və 13 məhsuldar ötürmə ilə fərqlənib.
Cari mövsümdə isə Bellingem “Real” üçün 3 oyun keçirib, 1 məhsuldar ötürmə verib.
Bellingem elə, ilk mövsümündəcə “Real”la İspaniya Super Kubokunun (2024), İspaniya La Liqasının (2023/2024), UEFA Çempionlar Liqasının (2023/2024) və UEFA Super Kubokunun (2024) qalibi olub.
Cud Bellingem 2020-ci ilin noyabr ayında debüt etdiyi İngiltərə yığmasının heyətində 36 oyun keçirib, 5 qol vurub və 6 məhsuldar ötürmə verib.
“Transfermarkt” internet-portalı 21 yaşlı ingilis yarımmüdafiəçinin transfer dəyərini 180 milyon avro məbləğində qiymətləndirir. Bu, Bellingemin dünyanın 3 ən bahalı futbolçusundan biri olması deməkdir.
