“Ayaks”dan “Əl-İttihad”a keçmiş Stiven Berqveyn Səudiyyə Ərəbistanı klubundan olan marağı necə öyrəndiyindən söhbət açıb.
Arena.az niderlandlı futbolçunun bu barədə məlumatını təqdim edir:
“Avqustun 30-u və ya 31-i idi. Amma transfer bazarının bağlandığı gün, sentyabrın 2-də klub yalnız ilkin təkliflə çıxış etdi və transfer sürətləndi. Səhər bildim ki, agentim Əli Dursun bütün gecəni mənim müqaviləmlə bağlı danışıqlar aparıbmış. Günortadan sonra Əli bütün sənədləri tamamladı və Amsterdamdakı xəstəxanada müstəqil həkimlər tərəfindən müayinə edilməyimi təşkil etdi. Daha sonra klubların danışıqları bitirməsini “Ayalks”ın stadionunda gözləməli oldum. Bu, çox əziyyətli idi”.
26 yaşlı niderlandlı vinger “Əl-İttihad”a keçməsi ilə bağlı qərarının səbəbini də açıqlayıb:
“Əl-İttihad” həqiqətən konkret idi. Məni heyətinə qatmaq istəyən çoxlu klubların adlarını oxudum, amma heç peyda olmadılar. Əlbəttə ki, maddi cəhətdən çox yaxşılaşacağam. Mən bu barədə səmimiyəm. Amma “Əl-İttihad” mənim üçün idman baxımından da maraqlıdır, çünki orada Kərim Benzema, Mussa Diabi, Danilo Pereyra, N’Qolo Kante və Fabinyo kimi yüksək səviyyəli futbolçular oynayırlar. Belə dünya səviyyəli oyunçularla komanda yoldaşı olmağı səbirsizliklə gözləyirəm. Səudiyyə Ərəbistanının Peşəkar Liqası isə qarşıdakı illərdə daha da güclənəcək”, deyə Berqveyn vurğulayıb.
Sol cinah hücumçusu mövqeyində çıxış edən Stiven Berqveyn futbola “Vaterveyk” klubunda qədəm qoyub. “Ayaks” və PSV-nin futbol akademiyalarında yetişmiş Berqveyn böyük futbola Eyndhoven təmsilçisinin heyətində gəlib. Niderlandlı hücumçu karyerası ərzində sonralar “Tottenhem” və “Ayaks”da çıxış edib.
2024-cü ilin sentyabrında “Əl-İttihad” 21 milyon avro məbləğ müqabilində Berqveyni “Ayaks”dan tamhüquqlu keçid əsasında öz heyətinə qatıb. Ərəb klubu niderlandlı futbolçu ilə müddəti 2027-ci ilin iyun ayının sonuna qədər qüvvədə olacaq müqavilə imzalayıb.
Geridə qalmış 2023/2024-cü illər mövsümündə Berqveyn “Ayaks”ın heyətində bütün yarışlarda 31 oyuna çıxıb, 13 qol vurub və 5 məhsuldar ötürmə verib.
Stiven Berqveyn 2018-ci ilin oktyabrında debüt etdiyi Niderland yığmasının heyətində 35 oyuna 8 qol və 3 məhsuldar ötürmə ilə fərqlənib.
Stiven Berqveynin qənimətlər muzeyində PSV ilə qazandığı Niderland çempionluğu (3 dəfə) və Niderland Super Kuboku var.
