Boks: Qadınlardan ibarət millimizdən “Böyük İpək Yolu”nda 9 medal

Bakıda təşkil olunmuş boks üzrə “Böyük İpək Yolu” beynəlxalq turnirində qadınlar arasında mübarizəyə yekun vurulub.

Arena.az xəbər verir ki, bu gün final döyüşləri keçirilib.

Azərbaycan millisinin 2 idmançısı həlledici görüşü qələbə ilə başa vurub.

50 kq-da Marjona Savriyeva komanda yoldaşı Günel Rəhimova üz-üzə gəlib. Görüşdə birinci tam üstünlüklə qələbə qazanıb.

Zeynəb Rəhimova da turnirin qalibi adına yiyələnib. O, finalda Şahina Nematovanı (Özbəkistan) 4:1 hesabı ilə məğlub edib.

Digər boksçularımızdan Mehparə Məmmədova (48 kq) həlledici görüşdə Erika Priskiandaroya (İtaliya), Lalə Namazlı (63 kq) isə Canfora Assuntaya (İtaliya) məğlub olduğundan ikinci yeri tutublar.

Beləliklə, qadınlardan ibarət Azərbaycan millisi “Böyük İpək Yolu”nu 2 qızıl, 3 gümüş və 4 bürünc medalla bitirib.

Yığmanın heyətində Marjona Savriyeva və Zeynəb Rəhimova birinci yeri tutublar. Günel Rəhimova, Mehparə Məmmədova və Lalə Namazlı gümüş medala yiyələniblər. Bir gün öncə isə Anaxanım İsmayılova (50 kq), Nərgiz Zeynalova (54 kq), Məhsəti Həmzəyeva və Aysu Dərvişova (hər ikisi 60 kq) 3-cü yerlə kifayətləniblər.

Xatırladaq ki, 11 ölkənin 121 idmançısının qatıldığı və Bakı Boks Mərkəzində keçirilən “Böyük İpək Yolu”nda kişi boksçuların mübarizəsi martın 28-də yekunlaşacaq.