Avropa Liqasının pley-off mərhələsində keçiriləcək “Braqa” – “Qarabağ” matçı üçün Ağdam klubunun azarkeşlərinə 1500 bilet ayrılıb.
Arena.az xəbər verir ki, bu barədə Azərbaycan çempionunun mətbuat xidməti məlumat yayıb.
Xəbərdə bildirilir ki, komandamızı dəstəkləmək istəyən azarkeşlər üçün ayrılmış biletlər oyun günü – fevralın 15-də yerli vaxtla saat 18:00-dan etibarən “Estadio Municipal de Braga” stadionunun 1-ci qapısında – A09 və A10 sektorlarının qarşısında satılacaq. Biletin qiyməti 40 avro (təxminən 74 manat) təşkil edir.
Ağdam klubunun yaydığı məlumatda o da vurğulanır ki, bilet almağa gələrkən özünüzlə şəxsiyyəti təsdiq edən sənəd götürməyiniz tələb olunur.
Xatırladaq ki, “Braqa” – “Qarabağ” oyunu fevralın 15-dən 16-na keçən gecə “Estadio Municipal de Braga” stadionunda keçiriləcək. Oyuna Bakı vaxtı ilə gecə yarısı – saat 00:00-da start veriləcək.
“Qarabağ”la “Braqa” arasındakı cavab oyunu isə fevralın 22-də Bakıdakı Tofiq Bəhramov adına Respublika stadionunda keçiriləcək. Bu oyuna saat 21:45-də start veriləcək.
