“Braqa” “Qarabağ”la matçdan öncə biabırçı hesabla uduzdu – Video

Azərbaycan çempionu “Qarabağ”ın Avropa Liqasının pley-off mərhələsindəki rəqibi “Braqa” növbəti matçına çıxıb.

Arena.az xəbər verir ki, sözügedən komanda Portuqaliya çempionatının 21-ci turu çərçivəsində lider “Sportinq”lə qarşılaşıb.

Lissabon təmsilçisi ilə səfərdə baş tutan bu oyun Braqanın eyniadlı təmsilçisinin biabırçı məğlubiyyəti ilə yekunlaşıb – 0:5. 8-ci dəqiqədə hesabı açan “Sportinq” 18-ci dəqiqədə daha bir qol vuraraq ilk hissəni 2:0 öndə bitirib. 71, 73 və 85-ci dəqiqədə də qonaqları mərkəzə dəvət edən lissabonlular darmadağına seviniblər.

Bu məğlubiyyətdən sonra braqalılar 40 xalla 4-cü pillədə qərarlaşıblar. Bu komanda növbəti matçını fevralın 15-də doğma meydanda məhz Azərbaycan çempionu “Qarabağ”a qarşı keçirəcək.

Xatırladaq ki, “Qarabağ”la “Braqa” arasındakı ilk oyun fevralın 15-dən 16-na keçən gecə Portuqaliyada baş tutacaq və saat 00:00-da başlayacaq. Bu komandaların cavab oyunu isə bir həftə sonra isə Bakıda təşkil ediləcək.