İngiltərənin “Mançester Yunayted” klubu yarımmüdafiəçisi Bruno Fernandes ilə müqavilənin müddətini artırıb. Arena.az xəbər verir ki, bu barədə Premyer Liqa təmsilçisinin rəsmi saytı məlumat yayıb.
Yeni müqavilə 2026-cı ilə qədər nəzərdə tutulub. Amma anlaşmada müqavilənin daha bir mövsüm uzadılması maddəsi də yer alıb.
Yeni müqavilə imzaladıqdan sonra portuqaliyalı yarımmüdafiəçi “Mançester Yunayted”də ən çox maaş alan 3 futbolçudan biri olub. Onun ildə 14-15 milyon avro qazanacağı bildirilir.
Bruno Fernandes 2020-ci ilin yanvarından “Mançester Yunayted”də çıxış edir. 27 yaşlı portuqaliyalı futbolçu bu müddət ərzində 117 oyun keçirib, 49 qol vurub, 39 məhsuldar ötürmə edib.
