“Salernitana”nın Seneqaldan olan hücumçusu Bulaye Dia İtaliya A Seriyasında may ayının ən yaxşı futbolçusu seçilib. Arena.az xəbər verir ki, bu barədə turnirin rəsmi saytı məlumat yayıb.
26 yaşlı forvard may ayında meydana çıxdığı 4 oyunda 4 qol vurub. O, ayın ən yaxşı oyunçusu adı uğrunda mübarizədə komanda Domeniko Berard (“Sassuolo”), Covanni Di Lorentso (“Napoli”), Romelu Lukaku (“İnter”) və Mattia Pessinanı (“Montsa”) geridə qoyub.
Xatırladaq ki, Bulaye Dia bu mövsüm ilk dəfədir A Seriyasında ayın ən yaxşı futbolçusu seçilir. Çempion “Napoli”nin gürcü hücumçusu Xviça Kvaratsxeliya daha çox – 3 dəfə ayın ən yaxşısı seçilib. “Milan”ın hücumçusu Rafael Leao da iki dəfə oxşar uğura imza atıb:
Avqust 2022 – Xviça Kvaratsxeliya (“Napoli”)
Sentyabr 2022 – Kim Min Jae (“Napoli”)
Oktyabr 2022 – Rafael Leao (“Milan”)
Noyabr 2022 – Moyze Kin (“Yuventus”)
Yanvar 2023 – Viktor Osimhen (“Napoli”)
Fevral 2023 – Xviça Kvaratsxeliya (“Napoli”)
Mart 2023 – Xviça Kvaratsxeliya (“Napoli”)
Aprel 2023 – Rafael Leao (“Milan”)
İtaliya A Seriyasında may ayının ən yaxşı məşqçisi isə “Fiorentina”nı çalışdıran Vinçentso İtalyano seçilib. Onun komandası ötən ay keçirdiyi beş oyundan ikisində qalib gəlib. Digər üç oyundan ikisi heç-heçə, biri məğlubiyyətlə bitib.
Əvvəlki aylarda İtaliya A Seriyasında ən yaxşı seçilən baş məşqçilər bunlar olublar:
Avqust 2022 – Joze Mourinyo (“Roma”)
Sentyabr 2022 – Andrea Sottil (“Udineze”)
Oktyabr 2022 – Luçano Spalletti (“Napoli”)
Noyabr 2022 – Massimiliano Alleqri (“Yuventus”)
Yanvar 2023 – Luçano Spalletti (“Napoli”)
Fevral 2023 – Tyaqo Motta (“Bolonya”)
Mart 2023 – Mauritsio Sarri (“Latsio”)
Aprel (2023) – Raffaele Palladino (“Montsa”)
