Bu gün futbol üzrə Almaniya çempionatında (Bundesliqa) 2022/2023 mövsümünün sonuncu – 34-cü turunun oyunları keçirilib. Arena.az xəbər verir ki, bütün qarşılaşmalar eyni gündə və saatda baş tutub.
Həlledici turda bütün diqqətlər lider “Borussiya” (Dortmund) ilə əsas izləyicisi “Bayern”in oyunlarına yönəlmişdi. Bu tura qədər 70 xalı olan dortmundlular doğma meydanda “Maynts”a qalib gələcəkləri halda çempionluğu bayram edəcəkdilər. “Bayern”ə isə bunun üçün səfərdə “Köln” üzərində qələbə yetərli deyildi. Münhenlilər bu matçda qalib gəlməklə yanaşı, liderin xal itirməsinə ümid bəsləməli idilər. Bu iki oyunun yekununda sevinən tərəf “Bayern” olub. Belə ki, bu komanda “Köln”ə qalib gəlməklə çempion olub. “Maynts”la “sülh bağlayan” “Borussiya” isə böyük fürsəti əldən verib və gümüş medallarla kifayətlənib.
Qeyd edək ki, bu, “Bayern”in tarixində 32-ci Bundesliqa çempionluğudur. İkinci və üçüncü yerdə cəmi 5 çempionluğu olan Dortmund və Mönhenqladbax “Borussiya”ları qərarlaşıblar. “Verder” isə 4 dəfə Almaniya çempionu olub.
Son turun digər oyunlarına gəlincə, Mönhenqladbax “Borussiya”sı “Auqsburq”u, “Bohum” “Bayer”i, “Ayntraxt” “Frayburq”u, “Leypsiq” “Şalke”ni, “Union Berlin” “Verder”i məğlub yola salıb. “Ştutqart” – “Hoffenhaym” matçında heç-heçə qeydə alınıbsa, “Volfsburq” da evdə “Herta”ya uduzb.
Beləliklə, mövsümün yekunlarına görə, 71 xal toplamış “Bayern”lə “Borussiya”, eləcə də 66 xalla bürünc medal qazanan “Leypsiq” və 62 xalla dördüncü olan “Union Berlin” Çempionlar Liqasına vəsiqə qazanıb. 59 xalla 5-ci yeri tutan “Frayburq” Avropa Liqasında oynamaq hüququ qazanıb. 50 xalı olan “Bayer” isə Avropa Konfrans Liqasında iştirak hüququ əldə edib. Eyni xala malik “Ayntraxt” isə avrokuboklarsız qalıb.
29 xalla sonuncu olan “Herta”, həmçinin 31 xala malik və 17-ci yerlə kifayətlənən “Şalke” əsas Bundesliqanı tərk etmək məcburiyyətində qalıb. 33 xalla 16-cı yeri tutan “Ştutqart”ı isə ikinci Bundesliqadan gələcək bir komanda ilə pley-off oyunları gözləyir.
Almaniya, Bundesliqa
34-cü tur
27 may
Borussiya (Mönhenqladbax) – Auqsburq 2:0
Qol: Nets, 4. Hofmann, 40.
Bohum – Bayer 3:0
Qol: Forster, 19. Asano, 34. Ştoger, 86.
Borussiya (Dortmund) – Maynts 2:2
Qol: R.Gerrero, 69. Sule, 90+6 – Olsen, 15. Onisivo, 24.
Ayntraxt – Frayburq 2:1
Qol: Muani, 83. Ebimbe, 90+1 – Qrifo, 45.
Köln – Bayern 1:2
Qol: Lyubiçiç, 81-pen – Koman, 8. Musiala, 89.
Leypsiq – Şalke 4:2
Qol: Laymer, 10. Nkunku, 19; 90+4. Poulsen, 82 – Kaminski, 28. Orban, 49-öz qapısına.
Ştutqart – Hoffenhaym 1:1
Qol: T.Tomas, 80 – Bebu, 75.
Union Berlin – Verder 1:0
Qol: Xedira, 81.
Volfsburq – Herta 1:2
Qol: Kaminski, 2 – Maza, 55. Rixter, 68.
