ÇEMPİONLAR LİQASI

Çempionlar Liqası (ÇL) – Avropanın ən məşhur futbol turniridir.

İlk oyunları 1955/56 mövsümündə keçirilən turnirin adı 1992-ci ilə qədər Çempion Klublar Kuboku olub. 1992/93 mövsümündən etibarən turnir Çempionlar Liqası adlanır.

Qaydalara əsasən, pley-off mərhələsini keçən komandalar qruplara bölünür. 1997-ci ildən etibarən klub reytinqləri yüksək olan ölkələrin çempionları ilə yanaşı 2-ci, 3-cü, bəzən isə 4-cü yeri tutmuş komandaları da turnirə birbaşa vəsiqə qazanır və ya pley-off mərhələsində oynamaq hüququ əldə edir. Hər komanda rəqib klub ilə 2 oyun keçirir (evdə və səfərdə). Qrupda müvəffəqiyyət qazanan komandalar öz aralarında 1/8, 1/4 və yarımfinal oyunları keçirir. Final isə 1 oyundan ibarət olur və neytral meydanda baş tutur.

Hər il qalib komandaya ÇL kuboku təqdim edilir. Kuboku 3 il ardıcıl və ya ümumilikdə beş dəfə qazanan komanda, onun dəqiq kopyasını saxlamaq hüququ əldə edir (orijinal kubok həmişə UEFA-da qalır). Bu vaxta kimi bu hüququ “Real”, “Ayaks”, “Bavariya”, “Milan”, “Liverpul” və “Barselona” əldə edib.

Azərbaycanı ÇL-də ilk dəfə “Neftçi” təmsil edib. “Ağ-qaralar” 1997-ci il iyulun 27-də Bakıda Polşa çempionu “Vidzev”lə üz-üzə gəlib və 0:2 uduzub. Səfərdəki cavab matçı isə daha biabırçı hesabla bitib – 0:8.

ÇL-də ilk qolumuzun müəllifi “Kəpəz”dir. 22 iyul 1998-ci ildə ilkin təsnifat mərhələsində Polşa “LKS-Lodz”u ilə qarşılaşan gəncəlilər səfərdəki ilk oyunda 1:4 hesabı ilə uduzublar. Həmin matçda İmamyar Süleymanovun vurduğu qol Azərbaycan klublarının ÇL-dəki ilk qolu oldu.

ÇL-də ilk qələbəmizi də 21 iyul 1999-cu ildə “Kəpəz” rəsmiləşdirib. Gəncəlilər ilk mərhələdə Makedoniya çempionu “Sloqa Yuqamaqnat”ına səfərdə 0:1 uduzub. İyulun 21-də Bakıdakı cavab matçında isə “Kəpəz” 2:1 hesabı ilə qələbə qazanıb. Lakin təəssüf ki, tarixi qələbə mərhələ keçmək üçün yetərsiz olub.

ÇL-də ilk mərhələ sevincini isə “Şəmkir” yaşadıb. 2000-ci ildə ilk mərhələdə “Skonto” ilə düşən “Şəmkir” səfərdəki ilk matçda 1:2 uduzsa da, 19 iyulda Bakıda keçirilən cavab matçında rəqibini darmadağın edərək Azərbaycan kluları arasında ilkə imza atıb – 3:0.