Coşqun Diniyev əvəzləndi, komandası qələbəni əldən verdi

Futbol üzrə Azərbaycan millisinin yarımmüdafiəçisi Coşqun Diniyev Türkiyənin “Ümraniyəspor” komandasının heyətində növbəti matçına çıxıb.

Arena.az xəbər verir ki, o, TFF 1-ci Liqanın 2023/2024 mövsümünün 16-cı turu çərçivəsində baş tutan “Ərzurumspor”la oyunun iştirakçısı olub.

“Ümraniyəspor” səfərdə baş tutan bu oyundan heç-heçə ilə ayrılıb – 1:1. Bu, İstanbul təmsilçisinin cari mövsümdəki dördüncü heç-heçəsidir.

Coşqun bu oyuna start heyətdə başlayıb və 87-ci dəqiqədə əvəzlənib. O, əvəzlənərkən sarı vərəqə də alıb. 40-cı dəqiqədən etibarən hesabda öndə olan Coşqunun komandası 90+5-ci dəqiqədə buraxdığı qolla qələbəni əldən verib.

Xatırladaq ki, Coşqun Diniyev “Ümraniyəspor”la bu ilin iyul ayında 1+1 illik müqavilə bağlayıb. 27 yaşlı futbolçu sözügedən komandanın heyətində indiyə qədər 17 oyuna çıxıb, 3 qola imza atıb, 1 məhsuldar ötürmə müəllifi olub.

16 turdan sonra “Ümraniyəspor” 19 xalla 18 iştirakçı arasında 10-cu pillədə qərarlaşıb.