Futbol üzrə Azərbaycan millisinin yarımmüdafiəçisi Coşqun Diniyev Türkiyənin “Bandırmaspor” klubunun heyətində növbəti matçına çıxıb.
Arena.az xəbər verir ki, sözügedən komanda ötən gecə TFF 1-ci Liqanın 2024/2025 mövsümünün 6-cı turu çərçivəsində “İstanbulspor”la qarşılaşıb.
Coşqunun komandası səfərdə baş tutan qarşılaşmadan qolsuz bərabərliklə ayrılıb – 0:0.
Diniyev bu oyuna start heyətdə başlayıb və 84-cü dəqiqədə əvəzlənib. O, 81-ci dəqiqədə sarı vərəqə ilə də cəzalanıb.
“Bandırmaspor” 6 turdan sonra 8 xalla 12-ci pillədə qərarlaşıb.
Xatırladaq ki, Coşqun Diniyev ötən mövsümü Türkiyə Birinci Liqasının digər təmsilçisi “Ümraniyəspor”da keçirib. 28 yaşlı azərbaycanlı futbolçu bu yay “Bandırmaspor”la 1 illik (2025-ci ilin 30 iyununa qədər) müqaviləyə imza atıb. O, bu komandanın heyətində hələlik 5 oyun keçirib və məhsuldar fəaliyyəti ilə diqqət çəkməyib.
