“Real”ın müdafiəçisi Dani Karvaxal La Liqanın “Real Sosyedad”la oyununda (2:0) komanda yoldaşı Vinisius Juniorun davranışını şərh edib.
Arena.az ispan futbolçunun bu xüsusda suala cavabını təqdim edir:
“Qoldan sonra Vinisiusun hərəkəti? Onun ünvanına təhqirlər eşitdik. Təxribata sürükləsəniz, cavabını da alacaqsınız”, deyə Dani Karvaxal vurğulayıb.
Xatırladaq ki, “Vini” qol vurduqdan sonra yerli azarkeşlərin toplaşdığı tribunaya yaxınlaşaraq, şəhadət barmağını dodaqlarına “sus” kəlməsini ifadə edən surətdə qoymuş və bununla da ünvanına yönəlmiş təhqirlərə qarşı etirazını nümayiş etdirmişdi.
Qeyd edək ki, “Real”ın braziliyalı ulduzunun klubdaxili münasibətləri pisləşir. İspaniyada, klubun düşərgəsindəki bir çox insanın Vinisiusun davranışından narazı olduğu haqda şayiələr baş alıb-gedir.
Bildirilir ki, müvafiq narazılığın mənbəyi futbol müstəvisinə aid deyil. Belə ki, braziliyalı futbolçu meydandankənar bir çox xüsuslarda yürütdüyü fikirlərlə bağlı qınaq dirəyinə çevrilib.
Vurğulanır ki, “Vini” bir qədər dəyişməlidir, yoxsa klubda öz mövqeyini itirəcək.
Vinisius Junior “Flamenqo”nun yetirməsidir. Braziliyalı cinah hücumçusu “Real”a 2018-ci ilin iyul ayında 45 milyon avro məbləğ müqabilində elə, “Flamenqo”dan keçib. Vinisiusun İspaniya nəhəngi ilə müqaviləsi 2027-ci ilin iyun ayının sonuna qədər qüvvədədir.
Cari mövsümdə “Vini” madridlilərin heyətində 7 oyuna çıxıb, 2 qol və 4 məhsuldar ötürmə ilə fərqlənib. Vinisiusun “Real”da çıxışının ümumi mənzərəsi isə belədir: 271 oyun, 85 qol, 79 məhsuldar ötürmə.
“Vini” “qaymaqlılar”la İspaniya La Liqasının (2019/2020, 2021/2022, 2023/2024), İspaniya Kral Kubokunun (2022/2023), İspaniya Super Kubokunun (2019/2020, 2021/2022, 2023/2024), Çempionlar Liqasının (2021/2022, 2023/2024), UEFA Super Kubokunun (2022/2023, 2024/2025), FIFA Klub Dünya Kubokunun (2019, 2023) qalibi olub.
Vinisius Junior 2019-cu ilin sentyabrında debüt etdiyi Braziliya milli komandasının heyətində 35 oyun keçirib, 5 qol vurub və 5 məhsuldar ötürmə verib. “Vini” Braziliyanın U-15, U-17 komandaları ilə Cənubiamerikan Çempionatının qalibi olub.
“Transfermarkt” internet-portalı 24 yaşlı braziliyalı sol vingerin transfer dəyərini 180 milyon avro məbləğində qiymətləndirir. Bu isə Vinisiusun dünyanın ən bahalı dörd futbolçusundan biri olması deməkdir.
