İsrail yığmasının və Almaniya nəhəngi “Bayern”in qapıçısı Daniel Perets Münhen klubundakı gələcəyi ilə bağlı fikrini bildirib.
Arena.az yəhudi qapıçının bu barədə fikrini təqdim edir:
“Mən daha yaxşı olmaq və idman formasında qalmaq üçün öz üzərimdə çox işləməyə çalışıram. Hazırda, mən icarəyə yollanmaq fikrində deyiləm”, deyə Perets iddiasını ortaya qoyub.
Daniel Perets Təl-Əviv “Makkabi”sinin yetirməsidir. Ölkəsində Təl-Əviv “Beytar”ının da formasını geyinmiş 24 yaşlı qolkiper “Bayern”ə 2023-cü ilin avqust ayında 5 milyon avro müqabilində keçib.
Daniel Almaniya nəhənginin heyətinə düşməkdə çətinlik çəkir. O, cari mövsümdə cəmi 1 oyuna çıxıb. İsrailli qapıçı həmin oyunda qapısını toxunulmaz saxlamağı bacarıb. Perets “Bayern”in əsas komandasında bütövlükdə 2 oyun keçirib, 2 qol buraxıb.
Daniel Perets İsrailin aşağı yaş qrupları üzrə müxtəlif yığmalarında oynayıb, 2022-ci ilin noyabr ayında isə əsas millidə debüt edib. O, İsrail millisinin heyətində 4 oyuna çıxıb, 3 qol buraxıb, 3 oyunda qapısını toxunulmaz saxlayıb.
“Transfermarkt” internet-portalı 24 yaşlı qapıçının transfer dəyərini 3 milyon avro məbləğində qiymətləndirir.
