İspaniya yığmasının baş məşqçisi Luis de la Fuente “Mançester Siti”nin ispan dayaq yarımmüdafiəçisi Rodrinin zədələnməsi haqda danışıb.
Arena.az “Mundo Deportivo” dərgisinə istinadən, ispan mütəxəssisin dayaq yarımmüdafiəçisi haqda fikrini təqdim edir:
“Mənim üçün Rodri bu mövqedə dünyanın ən yaxşı oyunçusudur. Bundan əlavə, Rodri əla kapitandır. Bu, bizim üçün böyük itkidir, amma oxşar mövqedə ikinci ən yaxşı oyunçuya sahibik – Martin Subimendi”, deyə De la Fuente bildirib.
İngiltərə Premyer Liqasının “Arsenal”a qarşı ev oyununda zədələnmiş Rodri cari mövsümün sonuna qədər sıradan çıxıb.
Xatırladaq ki, Rodri İspaniya yığmasının qalib gəldiyi son Avropa çempionatının (AÇ-2024) ən yaxşı futbolçusu seçilib və sabit oyunu ilə tanınır.
Rodriqo Ernandes Madrid “Atletiko”sunun yetirməsidir, ispan “dayaqçı” 2007-2013-cü illərdə “döşəkçilər”in klub sistemində olub. Daha sonra Rodri “Vilyarreal”a keçib. Ancaq 2018-ci ildə yarımmüdafiəçi 2019-cu ilə qədər oynadığı “Atletiko”ya qayıdıb.
Rodri hazırda çıxış etdiyi “Mançester Siti”yə 2019-cu ilin iyulunda 70 milyon avro məbləğ müqabilində elə, “Atletiko”dan keçib. Rodrinin “Mançester Siti” ilə müqaviləsi 2027-ci ilin iyun ayının sonuna qədər qüvvədədir.
Cari mövsümdə Rodri “şəhərlilər” üçün 3 oyun keçirib, məhsudalr fəaliyyəti ilə diqqət çəkməyib. Təcrübəli yarımmüdafiəçi “şəhərlilər”in heyətində bütövlükdə 260 oyuna çıxıb, 26 qol və 30 məhsuldar ötürmə müəllifi olub.
Rodri “Mançester Siti” ilə İngiltərə Premyer Liqasının (2020/2021, 2021/2022, 2022/2023, 2023/2024), İngiltərə Kubokunun (2023), İngiltərə Liqa Kubokunun (2020, 2021), İngiltərə Super Kubokunun (2020), Çempionlar Liqasının (2022/2023), UEFA Super Kubokunun (2023/2024), FIFA Klub Dünya Kubokunun (2024) qalibi olub. Rodri həmçinin Çempionlar Liqasında 2022/2023-cü illər mövsümünün oyunçusu seçilib.
Rodriqo Ernandes 2018-ci ilin martında debüt etdiyi İspaniya yığmasının heyətində 57 oyun keçirib, 4 qol vurub, 2 məhsuldar ötürmə verib. Rodri İspaniya yığması ilə 2023-cü il UEFA Millətlər Liqasının və 2024-cü il Avropa çempionatının qalibi olub.
“Transfermarkt” internet-portalı 28 yaşlı yarımmüdafiəçinin transfer dəyərini 130 milyon avro məbləğində qiymətləndirir. Bu isə Rodrinin futbol tarixində ən bahalı ispan futbolçu olması deməkdir.
