Qadın şahmatçılar arasında İspaniyada keçirilən dünya çempionatı davam edir. Arena.az xəbər verir ki, mundialda mübarizə aparan Azərbaycan millisi bu gün daha iki görüş keçirib.
Tərkibi Günay Məmmədzadə, Gülnar Məmmədova, Ülviyyə Fətəliyeva, Türkan Məmmədyarova və Zeynəb Məmmədyarovadan ibarət olan komandamız Rusiya və Fransa ilə qarşılaşıb.
A qrupunda yer alan komandamız 3-cü tur çərçivəsində Rusiya yığması ilə üz-üzə gəlib. Oyun rəqibin qələbəsi ilə başa çatıb. Ülviyyə rəqibi ilə heç-heçəyə razılaşsa da, Günay, Gülnar Məmmədova və Türkan məğlubiyyətə üzülüb.
Günün ikinci qarşılaşmasında isə komandamız Fransanı sınağa çəkib. Şahmatçılarımız bu görüşdə də uğursuz olublar. Bu dəfə yalnız Gülnar xal qazandığı halda, Günay, Ülviyyə və Zeynəb məğlub olub.
Azərbaycan millisi ilk oyun günündə Hindistan və Ermənistanla heç-heçə etmişdi. Dörd turdan sonra komandamız A qrupunda 2 xalla beşinci pillədə qərarlaşıb.
Dünya çempionatına oktyabrın 3-də yekun vurulacaq.
Dünya çempionatı
A qrupu
28 sentyabr
3-cü tur
Azərbaycan – Rusiya – 0,5:3,5
Günay Məmmədzadə – Aleksandra Qoryaçkina – 0:1
Gülnar Məmmədova – Aleksandra Kostenyuk – 0:1
Ülviyyə Fətəliyeva – Polina Şuvalova – 0,5:0,5
Türkan Məmmədyarova – Alina Kaşlinskaya – 0:1
4-cü tur
Fransa – Azərbaycan – 3,5:0,5
Mari Sebaq – Günay Məmmədzadə – 1:0
Nataşa Benmesbax – Ülviyyə Fətəliyeva – 1:0
Andrea Navrotesku – Gülnar Məmmədova – 0,5:0,5
Silviya Alekseyeva – Zeynəb Məmmədyarova – 1:0
