Futbol üzrə Azərbaycan millisinin yarımmüdafiəçisi Emil Mustafayev Ukraynanın “Polesye” komandasının heyətində növbəti matçına çıxıb.
Arena.az xəbər verir ki, azərbaycanlı futbolçu Ukrayna çempionatının (Premyer Liqa) 2024/2025 mövsümünün 15-ci turu çərçivəsində baş tutan “Krivbas”la matçın iştirakçısı olub.
“Polesye” bu rəqiblə səfərdə qarşılaşıb. Dörd qolun qeydə alındığı oyun meydan sahiblərinin qələbəsilə yekunlaşıb – 3:1.
Mustafayev bu görüşün 71-ci dəqiqəsində, hesab 1:1 olarkən meydana buraxılıb. Emilin komandası onun meydanda olduğu dəqiqələrdə (72-ci və 86-cı) daha iki qol buraxmaqla səfərdən xalsız qayıdıb.
Qeyd edək ki, bu, “Polesye”nin Ukrayna Premyer Liqasının 2024/2025-ci illər mövsümündəki üçüncü məğlubiyyətidir. Sözügedən komanda 6 turdur qələbəyə həsrətdir. Futbolçumuzun komandası bu müddətdə 3 heç-heçə edib, 3 məğlubiyyətə üzülüb.
Xatırladaq ki, Emil Mustafayev Ukraynanın digər klubu “Aleksandriya”nın yetirməsidir. Hücumameyilli yarımmüdafiəçi 2023-cü ilin iyul ayında azad agent kimi “Polesye”yə keçib. 22 yaşlı futbolçu indiyə qədər bu komandanın heyətində 33 oyuna çıxıb, 3 qol vurub, 5 məhsuldar ötürmə verib.
Vaxtilə Azərbaycanın U-21 yığmasında 3 oyun keçirmiş Mustafayev 2024-cü ilin mart ayında əsas millimizdə də debüt edib. Yarımmüdafiəçi Azərbaycan millisinin heyətində 5 oyuna çıxsa da, fərqlənə bilməyib.
Bu mövsüm keçirdiyi 14 oyuna 23 xal toplamış “Polesye” Premyer Liqanın turnir cədvəlində 16 iştirakçı arasında 5-ci yerdə qərarlaşıb. Emilin komandası 6 qələbə qazanıb, 5 heç-heçə edib və 3 məğlubiyyətlə üzləşib.
