“Arsenal”ın və “Çelsi”nin sabiq futbolçusu Eşli Koul “Əl-Nəsr”in hücumçusu Kristiano Ronaldo ilə qarşıdurması ilə bağlı xatirəsini paylaşıb.
Arena.az Koulun bu barədə xatirəsini təqdim edir:
“Ronaldo ilə mənim çox gözəl qarşılaşmalarımız olub və bir-birimizə qarşılıqlı hörmətimiz var.
Kristiano mənə həmişə kabuslar yaşadıb, amma bu mübarizələr ikimizi də yaxşılaşdırıb. Hər dəfə onun adını eşidəndə və ya üzünü görəndə məni necə şpaqata oturmağa məcbur etdiyini xatırlayıram”, deyə Koul səmimiyyətlə bildirib.
Eşli Koul “Arsenal”ın yetirməsidir. İngilis sol cinah müdafiəçisi “topçular”ın heyətində 1998-ci ildə debüt edib. 2006-cı ildə Koul “Çelsi”yə keçib və 2019-cu ildə “Derbi Kaunti”nin oyunçusu kimi futbolçu karyerasını bitirib.
Eşli “Arsenal”la 2 dəfə İngiltərə Premyer Liqasının qalibi olub, İngiltərə Kubokunu və İngiltərə Super Kubokunu qazanıb. “Çelsi” ilə isə Koul həm İngiltərə Premyer Liqasının qalibi olub, həm də Avropa səhnəsində qənimətlər qazanıb – Çempionlar Liqası və Avropa Liqasının qalibi olub.
Kristiano Ronaldo 2023-cü ilin yanvarından “Əl-Nəsr”də çıxış edir. Portuqal ulduz ərəb klubuna 2023-cü ilin yanvarında “Mançester Yunayted”dən azad agent qismində keçib. Ronaldonun “Əl-Nəsr”lə müqaviləsi 2025-ci ilin iyun ayının sonuna qədər qüvvədədir.
Cari mövsümdə portuqal hücumçu “Əl-Nəsr”in heyətində bütün yarışlarda 33 oyuna çıxıb, 30 qol vurub, 11 məhsuldar verib.
Kristiano hazırda kapitanı olduğu, 2003-cü ilin avqust ayının 20-də debüt etdiyi Portuqaliya yığmasının heyətində 205 oyun keçirib, 128 qol vurub və 46 məhsuldar ötürmə verib. Ronaldonun yığma komandanın heyətindəki oyun və qol sayı mütləq dünya rekordudur.
Ulduz futbolçu Portuqaliya yığmasının heyətində Avropa çempionatının (2016), UEFA Millətlər Liqasının (2019) qalibi, həmçinin Avropa çempionatını gümüş (2004) və bürünc (2012), FIFA Konfederasiyalar Kubokunun (2017) bürünc mükafatçısı olub.
“Transfermarkt” internet-portalı 39 yaşlı veteran hücumçunun transfer dəyərini 15 milyon avro məbləğində qiymətləndirir.
