Fransa da aparıcı futbol ölkələrindən biri hesab olunur. Ölkənin ali futbol qurumu Fransa Futbol Federasiyasıdır. Hansı ki, 1919-cu ildən fəaliyyət göstərir. Ölkənin aparıcı futbol liqaları bu qurumun bayrağı altında təşkil olunur, sadəcə, Liqa 1 və Liqa 2-nin rəhbərliyi Peşəkar Futbol Liqasına (LFP) verilib. Üstəlik kişi və qadınlardan ibarət yığma komandalar da məhz federasiyanın rəhbərliyi altında idarə olunur.

Fransada ilk modern futbol komandası 1872-ci ildə Havr şəhərində yaradılıb. Bu şəhərlə eyni adı daşıyan “Havr”, böyük uğurlara malik olmasa da, Fransanın ən köklü klubu hesab olunur.

Bu ölkədə milli futbol çempionatının keçirilməsinə 1930-cu ildə qərar verilib. 2002-ci ilə qədər milli çempionat, 1-ci divizion kimi tanınan Fransa birinciliyi 2002-ci ildən “Liqa 1” adlanmaqdadır. Fransanın ən titullu klubları “Sent-Etyen”, “Olimpik” (Marsel), PSJ, “Monako”, “Nant”, “Olimpik” (Lion), “Bord” və “Reyms”dir. Yəni, bəzi ölkələrdən fərqli olaraq, Fransada hansısa klubun ciddi hegemonluğuna rast gəlmək mümkün deyil.

Fransada Liqa 1 və Liqa 2 ilə yanaşı, Fransa kuboku da keçirilir ki, bu da ölkənin ən populyar turnirlərindən biri hesab olunur. 1917-ci ildən təşkil olunan bu turnirin ən çox qalibi olan klublar isə PSJ və “Olimpik”dir (Marsel).

Fransa yığması da dünyanın ən populyar milli komandalarından biri hesab olunur. Sözügedən komanda 1904-cu ildə yaradılıb. İki dəfə dünya (1998 və 2018-ci illərdə), iki dəfə isə Avropa çempionu (1984 və 2000-ci illərdə) olan fransızların iki dəfə FİFA Konfederasiyalar Kubokunda (2001 və 2003-cü illərdə), bir dəfə də Olimpiya Oyunlarında (1984-cü ildə) qızıl medal qazandığını qeyd etmək olar.

Azərbaycanda da Fransa yığmasının, eləcə də bəzi aparıcı klublarının azarkeşlərinə rast gəlmək mümkündür. Xüsusilə son illərdə PSJ-nin bir sıra ulduz futbolçuları heyətinə qatması sözügedən komandanın fanatlarını artırmaqdadır.