“Çelsi” və “Mançester Siti”nin sabiq yarımmüdafiəçisi Frenk Lempard bu komandaların İngiltərə Kubokunun yarımfinal görüşündən danışıb.
Arena.az Lempardın bu barədə fikirlərini təqdim edir:
“Bu gün “Mançester Siti”ni təhlil edə bilməyəcəyinizi düşünmürəm, bu, o “Mançester Siti” deyildi. Onların qığılcımları, ayaqlarında güc, təzyiq, itilik, öldürücü instinkt yox idi. Bu gün xasiyyət haqqında söhbət gedirdi”.
Frenk Lempard “zadəganlar”ın vingeri Koul Palmerin bu oyundakı çıxışından da danışıb: “Palmerin nə qədər uzağa gedə biləcəyi qorxu doğurur. Onun göstərdiyi səviyyə inanılmazdır. Mən ahəstə qoşulurdum. Bunun üçün Palmerə layiq olduğunu verirəm. “Çelsi”də özümü rahat hiss etmək üçün mənə bir il gərək oldu. O isə paltardəyişmə otağına girdi və “mən əsl kişiyəm”, dedi və öhdəsindən gəldi. O, səviyyəsi yüksəlməyə davam edən yüksək səviyyəli oyunçulardan birinə çevrilə bilər”, deyə Lempard vurğulayıb.
Xatırladaq ki, “Mançester Siti” “Çelsi” ilə yarımfinal oyununda minimal hesabla qalib gələrək (1:0) finala yüksəlib. “Şəhərlilər”i həlledici oyunda yenə “Mançester Yunayted”lə qarşılaşma gözləyir. Bu oyun mayın 25-də keçiriləcək.
Ötən mövsüm də İngiltərə Federasiya Kubokunun finalında iki Mançester təmsilçisi qarşılaşmış və 2:1 hesabıyla qalib gəlmiş “Siti” mükafatı başı üzərinə qaldırmışdı.
Koul Palmerə gəlincə, gənc futbolçu “Mançester Siti”nin yetirməsidir. O, “Çelsi”yə 2023-cü ilin sentyabrında 47 milyon avro müqabilində məhz Mançester klubundan keçib.
Cari mövsümdə Palmer “zadəganlar”ın heyətində 42 oyuna çıxıb. O, bu oyunlarda 25 qol və 13 məhsuldar ötürmə ilə fərqlənib.
Palmer ötən ilin noyabr ayında debüt etdiyi İngiltərə milli komandasında 2 oyun keçirsə də, hələ fərqlənə bilməyib. O, daha öncə İngiltərənin U-15, U-16, U-17, U-18, U-21 yığmalarında da oynayıb.
“Transfermarkt” internet-portalı 21 yaşlı Koul Palmeri 55 milyon avro məbləğində qiymətləndirir.
