“Fənərbaxça” ilə yollarını ayıran Gökhan Gönül bundan sonrakı karyerasını “Rizəspor”da davam etdirəcək. Arena.az xəbər verir ki, bu barədə Super Liqa klubunun rəsmi saytı məlumat yayıb.
36 yaşlı müdafiəçi yeni klubu ilə 2 illik müqaviləyə imza atıb. O, yeni komandasında “77” nömrəli formanı geyinəcək.
Qeyd edək ki, Gökhan Gönül ötən mövsümün əvvəlində “Beşiktaş”dan “Fənərbaxça”ya transfer edilmişdi. O, daha əvvəl 2007-2016-cı illər aralığında da bu komandanın formasını geyinmişdi. Geridə qalan mövsümdə 22 oyuna çıxıb, 2 qol və 2 məhsuldar ötürmə ilə yadda qalan futbolçu, bu komandanın heyətində bütövlükdə 360-dan çox matça çıxıb. O, peşəkar karyerasına 2003-cü ildə “Hacettepe” klubunda başlayıb. 2016-2020-ci illər aralığında “Beşiktaş”da çıxış edən futbolçu, Türkiyə millisində də 66 oyun keçirib, 1 qol vurub.
“Rizəspor” Seyfettin Anıl Yaşarı da heyətinə qatıb. “Afyonspor”dan transfer olunan 19 yaşlı müdafiəçi ilə 4 illik müqavilə imzalanıb.
