Güləş yığmalarımız Avropa çempionatına hazırlaşırlar

Azərbaycanın müxtəlif yarış qruplarından ibarət güləş üzrə milli komandaları qarşıdan gələn mühüm yarışlara intensiv hazırlaşır.

Arena.az xəbər verir ki, bu barədə Azərbaycan Güləş Federasiyasının rəsmi saytı məlumat yayıb.

Xəbərdə bildirilir ki, iyunun 24-dən iyulun 7-nə qədər Serbiyanın Novi Sad şəhərində U-17 və U-20 Avropa çempionatı keçiriləcək.

Bu yaş qrupu üzrə yığmalarımız müxtəlif məkanlarda təlim-məşq toplanışı keçir.

Yeniyetmələrdən ibarət sərbəst güləş komandamız iyunun 9-dan Xaçmaz Olimpiya İdman Kompleksində məskunlaşıb. Hazırlıq prosesi ayın 23-dək davam edəcək. Bu yaş qrupu üzrə yunan-Roma güləşi komandamız iyunun 3-dən paytaxtda toplanışa start verib. Çalışmalara iyunun 19-da yekun vurulacaq. Qızlardan ibarət kollektiv də qitə birinciliyinə Bakıda hazırlaşır. TMT 9-24 iyun tarixlərini əhatə edir.

Gənclərə gəlincə, sərbəst güləşçilər iyunun 2-dən Xaçmazdadır və ayın 12-dək Şimal bölgəsində məşqləri davam etdirəcək. AÇ öncəsi son TMT 16 iyundan 3 iyuladək Bakıda baş tutacaq. Mayın 22-dən iyunun 8-dək Göygöl Olimpiya İdman Kompleksində toplanış keçən gənc yunan-Roma güləşçilərimizin son hazırlıq prosesi 14-28 iyunda Azərbaycan Güləş Federasiyasının təlim-məşq bazasında təşkil ediləcək. Gənc qızlar da 16 iyun – 1 iyul tarixlərində Bakıda toplanış keçib, Novi Sada yollanacaq.

Yeri gəlmişkən, qadınlardan ibarət əsas komandamız bu gecə Macarıstana səfər edib. 10 günlük hazırlıq prosesi Tatada baş tutacaq. Ötən həftə həmin ölkədə keçirilən reytinq turnirində iştirak etmiş sərbəst güləşçilərimiz isə artıq vətənə qayıdıb. Komanda iyunun 12-dən Olimpiadaya hazırlığın növbəti mərhələsinə start verəcək. Ayın 26-dək Göygöldə fiziki hazırlığın yaxşılaşdırması məqsədilə toplanış həyata keçiriləcək. Yunan-Roma güləşçilərimiz də eyni məqsədlə Göygölə səfər edəcək. Bu komandamızın toplanışı 14-26 iyunu əhatə edəcək.