İngiltərənin “Hall Siti” klubu heyətini yeni futbolçularla gücləndirib. Arena.az xəbər verir ki, TV8-in rəhbəri Acun Ilıcalının sahibi olduğu klub “Fənərbaxça”dan icarəyə götürdüyü Allahyar Sayyadmaneşin transfer hüquqlarını alıb.
Bu barədə hər iki klubun rəsmi saytı məlumat yayıb. İrandan olan 21 yaşlı futbolçu ilə İngiltərə klubu arasında 4 illik müqavilə imzalanıb.
Xatırladaq ki, Allahyar Sayyadmaneş “Fənərbaxça”ya 2019-cu ilin yayında İranın “İstiqlal” klubundan transfer olunmuşdu. Lakin gənc forvard bu komandada möhkəmlənə bilmədiyi üçün əvvəlcə “İstanbulspor”a, daha sonra isə Ukraynanın “Zarya” klublarına icarəyə verilmişdi. Geridə qalan mövsümün ikinci dövrəsini isə futbolçu məhz “Hall Siti”də icarədə keçirmişdi. O, bu komandanın heyətində meydana çıxdığı 12 matçda 1 qol vurub. İran millisinin də üzvü olan futbolçu İstanbul təmsilçisində cəmi 3 matça çıxıb.
“Hall Siti” “Qalatasaray”ın sabiq yarımmüdafiəçisi Jan Mişel Serini də transfer edib. Çempionşip təmsilçisi 30 yaşlı futbolçu ilə 3 illik müqavilə imzalandığını açıqlayıb. 2018-ci ildən “Fulhem”də çıxış edən yarımmüdafiəçi, 2019/20 mövsümündə “Qalatasaray”da icarədə oynamışdı. O, 2021-ci ildə də “Bordo”da icarədə olub. Fil Dişi Sahili yığmasının üzvü “Pasuş de Ferreyra” və “Nitsa”da da çıxış edib.
Növbəti mövsümdə Premyer Liqaya yüksəlməyi hədəfləyən “Hall Siti”nin baş məşqçisi Şota Arveladzedir. Çempionşip təmsilçisi daha öncə Ozan Tufan, Tobias Fiqeyredo və Natan Baksteri də transfer etmişdi.
