İtaliya futbolu: İtaliyada da futbol ən populyar idman növüdür.

Bu ölkənin milli komandası isə dünyanın ən yaxşı yığmalarından biri sayılır. Təsadüfi deyil ki, bu ölkə dörd dəfə (1934, 1938, 1982, 2006) dünya çempionu olub. Bu baxımdan italyanlar yalnız Braziliyadan (5 çempionluq) geri qalırlar.

İtaliya həm də dünya çempionatlarında 2 dəfə gümüş (1970, 1994), 1 dəfə bürünc (1990) medal qazanıb, 1 dəfə də dördüncü (1978) yerlə kifayətlənməli olub. Yəni, bu komanda bütövlükdə 17 dəfə dünyanın ən güclü dörd komandası arasında yer almağı bacarıb.

İtaliya yığması bir dəfə (1968-ci ildə) Avropa çempionu da olub. İki dəfə (2000, 2012) Avropa ikinciliyini təmin edən bu komandanın bir dəfə Yay Olimpiya Oyunlarının qalibi olduğunu da vurğulamaq olar.

A Seriyası adlandırılan İtaliya çempionatı da dünyanın ən məşhur liqalarından biri hesab edilir. Avrokuboklarda böyük uğurlar qazanan “Yuventus”, “Milan”, “İnter” kimi nəhəng klublar məhz A Seriyasında mübarizə aparır.

İtaliyada futbol yarışları 1898-1929 illər aralığında regional prinsip ilə parçalanmış qruplar üzrə keçirilirdi. A Seriyası indiki formatda öz fəaliyyətində 1929-cu ildən başlayıb. İtaliya A Seriyasının ən titullu komandası isə “Yuventus”dur. Bu baxımdan turinlilərin əsas izləyiciləri “Milan” və “İnter”dir.

A Seriyasında hər 10 titul qazanan klub emblemi üzərində kiçik qızıl ulduzu daşımaq hüququ qazanır. Bu üzdən 30-dan çox çempionluğu olan “Yuventus”un üç ulduzu, Milan şəhərini təmsil edən 2 klubun bir ulduzu var.

Ölkədə A Seriyasından sonrakı ən nüfuzlu yarış isə İtaliya kubokudur. Bu ölkədə kubok yarışları 1922-ci ildən təşkil olunmağa başlayıb.

İtaliya futbolu ilə yaxından maraqlananlar Azərbaycanda da kifayət qədərdir. Elə A Seriyasına da böyük maraq var. Ölkəmizdə İtaliya milli komandasının, İtaliyanın aparıcı klublarının azarkeşləri də yetərincədir.