“Jirona”nın baş məşqçisi Miçel Anxel “Kadis”i evdə məğlub edərək (4:1) Avropa yarışlarına vəsiqə qazandıqdan sonra klubun hədəfini bildirib.
Arena.az “El Chiringuito TV”-yə istinadən, ispan mütəxəssisin bu barədə fikirlərini təqdim edir:
“Biz dayanmaq fikrində deyilik. Çempionlar Liqasına düşmək arzumuz üçün mübarizəmizi davam etdirəcəyik”, deyə Miçel Anxel qətiyyət və inamla vurğulayıb.
La Liqada 2023/2024 mövsümünün bitməsinə 6 tur qalmış “Jirona” 32 oyundan 68 xalla yarış cədvəlinin 3-cü pilləsində qərarlaşıb. Sözügedən komanda qalan turlarda uğursuz çıxış etsə belə, mütləq 6-cı yerdən aşağı düşməyəcək ki, bu da Avropa Liqasında iştirak hüququ verir. Amma klub hazırda birbaşa UEFA Çempionlar Liqasını qrup mərhələsinə vəsiqə uğrunda mübarizə aparır.
Hazırda “Real” 32 oyundan 81 xalla La Liqanın yarış cədvəlinin zirvəsində qərarlaşıb. “Qaymaqlılar” ən yaxın izləyicisi “Barselona”nı (70 xal) 11 xal qabaqlayırlar. İlk üçlüyü isə 68 xalla Kataloniyanın digər təmsilçisi, “Jirona” qapayır. Göründüyü kimi, Kataloniyanın hər iki təmsilçisi La Liqanın “gümüş”ünə iddia edirlər.
