“Barselona”nın sol cinah müdafiəçisi Jordi Alba cari mövsümün bitməsilə klubu tərk etmək haqda qərar qəbul edib.
Arena.az “Mundo Deportivo”ya istinadən xəbər verir ki, ispan müdafiəçi gedişi haqda rəsmi məlumatı mayın 24-də, günün ikinci yarısında KİV-lə görüşdə bildirəcək.
Bazar günü, mayın 28-də isə Jordi Alba və Serxio Buskets “Barselona” azarkeşləri ilə doğma stadionda vidalaşacaqlar.
11 illik “Barselona” karyerası ərzində Alba 458 oyunda meydana çıxıb, 27 qol vurub, 99 məhsuldar ötürmə edib. 34 yaşlı müdafiəçi kataloniyalılarla 18 titul qazanıb. Bunların arasında 6 İspaniya çempionluğu və 1 Çempionlar Liqası kuboku da var:
İspaniya La Liqası: 2012/2013, 2014/2015, 2015/2016, 2017/2018, 2018/2019, 2022/2023
İspaniya kuboku: 2014/2015, 2015/2016, 2016/2017, 2017/2018, 2020/2021; 2018/2019.
İspaniya Super Kuboku: 2013, 2016, 2018, 2022
UEFA Çempionlar Liqası: 2014/2015
FIFA klublararası dünya çempionatı: 2015.
Jordi Alba daha öncə “Korneliya”, “Valensiya” və “Ximnastik”də də forma geyinib. Təcrübəli müdafiəçi İspaniya milli komandasında da 91 oyun keçirib, 9 qola imza atıb. O, millinin heyətində AÇ-2012-nin qalibi olub.
