Premyer Liqada “Ayın qolu” layihəsi çərçivəsində avqust ayının qalibi olan “Sumqayıt”ın futbolçusu Kamran Quliyev mükafatlandırılıb.
Arena.az xəbər verir ki, ona Azərbaycan Premyer Liqasının 7-ci turu çərçivəsində bu gün baş tutan “Zirə” ilə görüşdən əvvəl mükafatlar təqdim olunub.
Mükafatları Mehdi Hüseynzadə adına Sumqayıt şəhər stadionunda Peşəkar Futbol Liqasının Texniki-idman direktoru Elgiz Abbasov təqdim edib.
Xatırladaq ki, Kamran Quliyev Azərbaycan Premyer Liqasının 3-cü turu çərçivəsində “Səbail”ə 2:1 hesabıyla qalib gəldikləri ev oyununda komandasının ilk qoluna imza atmışdı. Onun məhz bu qolu “Ayın qolu” layihəsi çərçivəsində azarkeşlər arasında keçirilən sorğuda ən yaxşı seçilib.
Kamran 2023-cü ilin yayından “Sumqayıt”da çıxış edir. 24 yaşlı hücumçu bu komandanın heyətində 25 oyuna 4 qol vurub, 1 assistlə yadda qalıb. O, daha öncə “Şamaxı”, “Sabah” və “Yonava” kimi klublarda da çıxış edib, Azərbaycanın U-19 və U-21 yığmalarında oynayıb.
