Azərbaycan Premyer Liqasında mübarizə aparan “Şamaxı”nın isveçrəli hücumçusu Karim Rossi ölkəsinin “Blick” nəşrinə müsahibə verib.
Arena.az xəbər verir ki, bölgə klubuna bu yay qoşulmuş təcrübəli forvard Azərbaycan Premyer Liqasının səviyyəsini müzakirə edib:
– Azərbaycan sizin üçün yeni bir ölkədir. Bu keçid necə baş verdi?
– “Şaffhauzen”lə müqaviləmin müddəti bitmişdi, klubun aşağı liqaya düşməməsinə kömək etmək və ən əsası, ikinci uşağımın dünyaya gəlməsi üçün orda olmalı idim. Təəssüf ki, müqaviləmizi davam etdirə bilmədik. Bundan sonra klubun təklifinə baxmayaraq, qalmaq istəmədim. Hələ yaxşı səviyyədə oynamaq üçün ehtiyatım qalırdı. İsveçrədə bir neçə əlaqəm var idi, amma həqiqətən maraqlı bir şey olmadı. Sonra agentim mənə Azərbaycan variantı ilə bağlı zəng etdi. İki il əvvəl buradan təklif almışdım. Bu dəfə məşqçi mənə zəng vurdu, layihəni təqdim etdi və mən də bəyəndim. Yeni çətinliklərdən, digər mədəniyyətləri və liqaları kəşf etməkdən zövq alıram. Bu fürsət təsadüfən yarandı, amma axtardığım şeyə tam uyğun gəldi.
– Ailəniz bu yeni macərada sizə qoşuldu?
– Bəli, onlar ardımca gəldilər. Bəzən ora-bura səyahət edirik, amma onlar çox vaxt mənimlə yaşayırlar. Şərait yaxşıdır, ona görə də bizim buna imkanımız var.
– Azərbaycan Premyer Liqasının səviyyəsini necə qiymətləndirərdiniz?
– Onu Kipr və ya Bolqarıstan çempionatları ilə müqayisə edərdim. Azərbaycan Premyer Liqası “Qarabağ” istisna olmaqla, eyni gücdə olan komandaların olduğu çempionatdır. Çünki “Qarabağ” burada dominantlıq edir. Ölkə infrastruktura və akademiyalara böyük sərmayə qoyur. Federasiya ciddi inkişaf üçün işlər görür. Bu, maraqlı liqadır və inkişafdadır.
“Qarabağ”ın ÇL-dəki nəticələri inanılmazdır”
Karim Rossi “Qarabağ”ın UEFA Çempionlar Liqasının əsas mərhələsindəki çıxışına da toxunub:
– “Qarabağ” Çempionlar Liqasında “Benfika”nı (3:2) və “Kopenhagen”i (2:0) məğlub etdi, “Çelsi” ilə (2:2) heç-heçə oynadı. Bu, inanılmazdır! Çox da təəccüblənmirəm, çünki onların oyunlarını hər həftə izləyirəm. Çox güclü komandadır. Onların uğuru liqaya fayda verir. Bu, diqqəti cəlb edir və burda çoxlu rəqabət olduğunu göstərir.
– Bu yaxında onlarla 0:0 oynadınız. Bununla fəxr edirsiniz?
– Bəli, əlbəttə. Futboldur, belə nəticələr olur. Bunun heç bir məntiqi yoxdur. Kağız üzərində “Qarabağ” açıq-aydın favoritdir, amma meydanda hər şey ola bilər. Bir planımız var idi və onu uğurla həyata keçirdik. Futbol gözlənilməz olaraq qalır və onu bu qədər möhtəşəm edən də elə budur.
– Klubunuz olduqca gəncdir və adını bir neçə dəfə dəyişdirib ki, bu da qeyri-adi haldır. Azarkeşlərlə klub arasında güclü bir əlaqə hiss edirsiniz?
– Bu gün klub hazırkı şəhərində möhkəm yerləşib. Kiçik bir sadiq azarkeş qrupu var, amma bunu “Qarabağ” və ya “Neftçi” azarkeşləri ilə müqayisə etmək olmaz. Bir çox komanda Bakıda məşq edir və sonra başqa yerlərdə oyunlar keçirir. Bu, özünəməxsus sistemdir. Əsl azarkeş bazası yaratmaq üçün ideal deyil, amma müəyyən səviyyədə həvəs hələ də var. İnsanlar futbolu sevirlər, amma klub mədəniyyəti ilə eyni deyillər. Fərqli bir atmosferdir.
Karim Rossi Azərbaycan dilini də öyrənməyə çalışır
– Orda necə məskunlaşdın?
– Çox yaxşı. Azərbaycan müsəlman ölkəsidir, ona görə də adət-ənənələri ilə tanışam. Burda məscidlər var, azan verilir, bütün bunlar da mədəniyyətimin bir hissəsidir. Bu, mənim üçün mədəni şok deyil. Dil fərqli hekayədir, türk dilinə yaxındır. Bir neçə söz öyrənmişəm, amma tərcüməçimiz var. Oyunçuların əksəriyyəti ingilis dilində danışır, ona görə də bir-birimizi başa düşürük. Bakı məni həqiqətən təəccübləndirdi, göydələnləri olan ultra-müasir bir şəhərdir, bir az mini-Dubay kimi. Ölkə inanılmaz dərəcədə inkişaf edib.
– Azərbaycan Asiyadır, yoxsa Avropa?
– Yaxşı sualdır! (gülür). Azərbaycanın fərqli bir türk və rus təsiri var, çox fərqlidir. Coğrafi cəhətdən Asiyaya daha yaxındır, amma orta mövqedə olduğu hiss olunur. Lakin, bu, Avropa Birliyinin bir hissəsi deyil. Məsələn, İsveçrədən gələn paket beynəlxalq göndəriş hesab olunur.
– Bu mövsüm üçün hədəfləriniz nədir?
– Həmişə olduğu kimi, karyeramın ən yaxşı mövsümünü keçirmək. Ümid edirəm ki, qol vura və məhsuldar ötürmələr edə bilərəm. Bu, tamamilə əldə edilə bilən bir məqsəddir.
– Klub avrokuboklara can atmır?
– Xeyr, bu mövsümün məqsədi bu deyil. Büdcəmiz ölkənin böyük klublarının büdcəsindən çox geridədir. Məqsəd ötən ilki nəticəni daha da yaxşılaşdırmaqdır. Ötən mövsüm komanda 7-ci yeri tutmuşdu. 1-2 pillə irəliləyib liqanın ən yaxşı komandalarına meydan oxuya bilsək, bu, əla olardı. 12 komandalı liqada işlər tez dəyişir: iki qələbə və zirvədəsən, iki məğlubiyyət və ən aşağı pilləyə düşürsən.
– Bir illik müqavilə imzaladın. Bu haqda fikrin necədir?
– Klub bunu mənə təklif etdi. Bəlkə də yaşıma görə idi, amma mənə də uyğun gəldi. Bu, çox öhdəlik götürmədən liqa haqqında məlumat əldə etməyin bir yol idi. Müqaviləmi yeniləyib-yeniləmədiyimi sonra görəcəyik. Son illərdə tez-tez bir illik müqavilələr imzalayırdım və bu, məni razı salırdı.
