Fransanın PSJ klubunun mərkəz yarımmüdafiəçisi Karlos Soler icarə müqaviləsi əsasında İngiltərə təmsilçisi “Vest Hem”ə keçib.
Arena.az bu barədə sözügedən klubun rəsmi saytına istinadən məlumat verir.
Premyer Liqa klubu 27 yaşlı ispan futbolçunu bu mövsümün sonuna kimi satınalma şərti ilə icarəyə götürüb.
Karlos Soler “Valensiya”nın yetirməsidir. PSJ onu 2022-ci ilin sentyabrında 18 milyon avroya heyətinə qatmışdı. Solerin Paris klubu ilə 2027-ci ilin 30 iyununa kimi müqaviləsi var. O, paytaxt klubunun heyətində 63 oyuna çıxıb, 8 qol və 8 assistlə yadda qalıb.
Soler 2021-ci ildən İspaniya yığmasında çıxış edir. O, millidə 14 oyuna 4 qol vurub.
PSJ-nin hücumameyilli yarımmüdafiəçisi İsmael Qarbi də azad agent kimi “Braqa”ya keçib. Həm İspaniya, həm də Fransa vətəndaşlığı olan 20 yaşlı futbolçu Portuqaliya klubu ilə 5 illik müqaviləyə imza atıb.
İsmael Qarbi PSJ-nin yetirməsidir. Paris klubunun əsas komandasında 12 oyuna 1 assistlə yadda qalmış yarımmüdafiəçi, “Lozanna Uşi”də icarədə də olub. Qarbi həm Fransanın, həm də İspaniyanın U-18 yığmasında oynayıb. O, ispanların U-19 yığmasının da formasını geyinib.
“Vest Hem”də üç ayrılıq
Karlos Soleri heyətinə qatmış “Vest Hem”də də üç ayrılıq qeydə alınıb. Təcrübəli mərkəz müdafiəçisi Ancelo Oqbonna azad agent kimi “Uotford”a keçib. 36 yaşlı futbolçu yeni klubu ilə 1 illik müqavilə bağlayıb. 2015-ci ildən formasını geyindiyi “Vest Hem”də 249 oyun keçirmiş müdafiəçi, 13 qol və 1 assistlə yadda qalıb. O, “Torino”, “Yuventus”, “Krotone” kimi klubların da şərəfini qoruyub. Oqbonna İtaliya yığmasında da 13 oyun keçirib.
“Vest Hem” vinger Maksvel Korne ilə mərkəz müdafiəçisi Kurt Zumanı da icarəyə verib. Korne “Sauthempton”a, Zuma isə Səudiyyə Ərəbistanının “Əl-Oroba” klubuna keçib. Hər iki futbolçunun 2025-ci ilin 30 iyununadək icarədə çıxış edəcəyi diqqətə çatdırılıb.
Korne 2022-ci ilin avqustundan formasını geyindiyi “Vest Hem”də 37 oyuna 1 qol və 6 assistlə yadda qalıb. “Olimpik” (Lion), “Börnli”, “Mets” kimi klublarda da oynamış 27 yaşlı hücumçu, Fransanın aşağı yaş qruplarında çıxış edib. 2017-ci ildən Kot-d’İvuar yığmasında oynamağa qərar vermiş futbolçu, 31 oyunda 6 qol vurub, 1 məhsuldar ötürmə verib.
Kurt Zuma isə 2021-ci ilin avqustundan “Vest Hem”in uğurları üçün çalışırdı. Premyer Liqa klubunda 103 oyuna 6 qol və 1 assist müəllifi olmuş müdafiəçi, karyerası ərzində “Çelsi”, “Sent Etyen”, “Stok Siti”, “Everton” kimi klubların da formasını geyinib. Zuma 2015-ci ildə debüt etdiyi Fransa yığmasında 11 oyuna 1 qol vurub.
