PSJ-nin fransalı ulduz hücumçusu Kilian Mbappe klub prezidenti, qətərli iş adamı Nasser Əl-Xelaifi ilə münaqişə edib.
Arena.az bu barədə “Le Parisien” dərgisinə istinadən məlumat verir.
Mənbənin məlumatına görə, xoşagəlməz vəziyyət Fransa Liqa 1-in 33-cü turunda PSJ və Tuluza komandalarının qarşılaşdığı (1:3) oyundan əvvəl yaşanıb. Parisin “Park de Prens” stadionunda baş tutan oyundan əvvəl Əl-Xelaifi Mbappe ilə görüşüb və Kiliandan vida videomüraciətində onun adını nə səbəbə xüsusi qeyd etmədiyini soruşub. Bundan sonra dava düşüb və “qışqırıqlar eşidilib”. Vurğulanır ki, Əl-Xelaifi özünə əl qatıb, səsini başına ataraq qışqır-bağır salıb.
Xatırladaq ki, bundan əvvəl mətbuatda, Mbappe ilə Əl-Xelaifinin münaqişəsi olduğu barədə məlumatlar yayılmışdı. Ehtimal edilir ki, məhz bununla bağlı Kilian mayın 10-da ictimaiyyətə ünvanladığı, PSJ ilə vida videomüraciətində klub prezidentinin adını çəkməyib.
Mbappenin Fransa nəhəngi ilə cari müqaviləsi cari ilin iyun ayının sonunda başa çatacaq və artıq məlum olduğu kimi, fransalı ulduz azad agent qismində İspaniya nəhəngi “Real”a qoşulacaq.
Cari mövsümdə Mbappe PSJ-nin heyətində bütün yarışlarda 47 oyuna çıxıb, 44 qol vurub, 10 məhsuldar ötürmə verib. Mbappenin Paris klubunun heyətində çxışının ümumi mənzərəsi isə belədir: 307 oyun, 256 qol, 108 məhsuldar ötürmə. Vurduğu 255 qolla Mbappe PSJ tarixinin ən sərrast futbolçusudur.
Kilian Mbappe hazırda kapitanı olduğu, 2017-ci ilin martında debüt etdiyi Fransa yığmasının heyətində 77 oyun keçirib, 46 qol vurub və 31 məhsuldar ötürmə verib. Kilian “xoruzlar”la 2018-ci ildə Rusiyada keçirilmiş dünya çempionatının (DÇ-2018) və UEFA Millətlər Liqasının (2021) qalibi olub.
Klub səviyyəsində Mbappe PSJ ilə 7 dəfə Fransa Liqa 1-in, 3 dəfə Fransa Kubokunun, 2 dəfə Fransa Liqa Kubokunun, 3 dəfə Fransa Super Kubokunun qalibi olub, həmçinin fransalı ulduz hücumçu dəfələrlə müxtəlif fərdi mükafatlara layiq görülüb.
“Transfermarkt” internet-portalı 25 yaşlı fransalı mərkəz hücumçusu Kilian Mbappenin transfer dəyərini 180 milyon avro məbləğində qiymətləndirir. Bu məbləğ Mbappenin dünyanın 3 ən bahalı futbolçusundan biri olması deməkdir.
