PSJ-nin prezidenti Nasser Əl-Xelaifi ilə parislilərin keçmiş hücumçusu Kilian Mbappe arasında münaqişənin səbəblərindən biri aşkara çıxıb.
Arena.az bu barədə “Ekip” nəşrinə istinadən məlumat verir.
Belə ki, PSJ-nin prezidenti, qətərli iş adamı Nasser Əl-Xelaifi ilə Fransa nəhənginin keçmiş hücumçusu Kilian Mbappe arasında münaqişənin səbəblərindən biri, Paris klubunun rəhbərinin Kilianın kiçik qardaşı Etan Mbappenin komanda heyətinə salınmaması ilə bağlı qərarı olub.
Mənbənin məlumatına görə, PSJ-nin rəhbəri, komandanın ispan baş məşqçisi Luis Enrikedən Etan Mbappeni ötən mövsüm Fransa çempionatının 33-cü turunun “Tuluza” ilə oyununda heyətə daxil etməməyi xahiş edib. Bundan sonra ispan mütəxəssisin qərarından xəbər tutmuş Kilian kiçik qardaşı Etanın paltardəyişmə otağında ağladığını görüb. Bu, Mbappenin kəskin narazılığına səbəb olub və bununla əlaqədar fransalı ulduz prezident Əl-Xelaifiyə klubun ona olan 55 milyon avro məbləğində maaş borcunu bağışlamayacağını bildirib.
Kilian Mbappe futbola Fransanın “Bondi” klubunda qədəm qoyub. Ardınca “Klerfonten”ə keçib, oradan isə “Monako”ya yol tapıb və böyük futbolda məhz “Monako” ilə debüt edib. 2015-2018-ci illərdə Knyazlıq klubunun əsas komandasında çıxış etmiş Mbappe, 2018-ci ilin iyulunda 180 milyon avro müqabilində PSJ-nin düşərgəsinə keçib. Kilian 2018-2024-cü illər aralığında Paris klubunun heyətində 307 oyuna çıxıb, 256 qol, 108 məhsuldar ötürmə ilə yadda qalıb. Vurduğu 256 qolla Mbappe PSJ tarixinin ən sərrast futbolçusudur.
Kilian Mbappe 2024-cü ilin iyul ayında PSJ-dən azad agent qismində ayrılaraq, İspaniya nəhəngi “Real”ın düşərgəsinə keçib. “Kral klubu” fransalı hücumçu ilə müddəti 2029-cu ilin iyun ayının sonuna qədər qüvvədə olacaq müqavilə imzalayıb.
Cari mövsümdə Mbappe “Real”ın heyətində bütün yarışlarda 14 oyuna çıxıb, 8 qol vurub, 2 məhsuldar ötürmə verib.
Klub səviyyəsində Mbappe PSJ ilə 7 dəfə Fransa Liqa 1-in, 3 dəfə Fransa Kubokunun, 2 dəfə Fransa Liqa Kubokunun, 3 dəfə Fransa Super Kubokunun qalibi olub, həmçinin dəfələrlə müxtəlif fərdi mükafatlara layiq görülüb. “Real”la isə Mbappe UEFA Super Kubokunun qalibi olub.
“Transfermarkt” internet-portalı 25 yaşlı fransalı mərkəz hücumçusunun transfer dəyərini 180 milyon avro məbləğində qiymətləndirir.
